ეკატერინე გორგოძემ ფავორიტად მიჩნეული ჩეხი ვენდულა ვალდმანოვა 6:2; 7:6 დაამარცხა.
პირველ სეტში ჩვენებურმა ბრეიკი ჯერ დასაწყისში აიღო, შემდეგ სეტის ბოლოს და მარტივად მოიგო. გორგოძემ მეორე სეტის მესამე გეიმშიც გაახერხა ბრეიკი, მაგრამ მალევე საკუთარი ჩაწოდებაც წააგო და ბედი ტაი ბრეიკს მიანდო, იქ კი, მარტივად მოიგო.
მარიამ ბოლქვაძის მეტოქე ავსტრიელი ჯულია გრაბერი იყო და ჩვენებურმა 6:4; 7:6 მოიგო. პირველ სეტში მარიამი ბრეიკით ორჯერ ჩამორჩა, მაგრამ ორივეჯერ გაათანაბრა, ბოლოს კი, მეტოქეს ჩაწოდება სულაც მესამედ აართვა და სეტიც წაიღო. დრამატულად განვითარდა მოვლენები მეორე სეტშიც: ჯერ მარიამი დაწინაურდა ბრეიკით, შემდეგ გრაბერის ზედიზედ ორი ბრეიკით წინ ავსტრიელი იყო, მაგრამ ბოლქვაძემ მყისიერად უპასუხა და სეტისა და პარტიის ბედი ტაი ბრეიკში გადაწყდა.
მეორე საკვალიფიკაციო ეტაპზე გორგოძის მეტოქე ფრანგი ლოლიტა ჟანჟანი იქნება, ბოლქვაძე კი, იაპონელ ჰაიუ კინოშიტას გაეჯიბრება.
ნიკოლოზ ბასილაშვილი უიმბლდონის საკვალიფიკაციო ეტაპს პირველივე წრეში დაემშვიდობა. ჩვენებური მსოფლიოს 185-ე ჩოგან შვედ ელიას იმერთან 6:2; 3:6; 6:7 დამარცხდა.
არადა, ბასილაშვილმა კარგად დაიწყო და პირველ სეტში მეტოქეს ორი ბრეიკი აართვა, რის მოგებაც აღარ გასჭირვებია; ბრეიკით დაიწყო ჩვენებურმა მეორე სეტიც, მაგრამ შემდეგ თავად ორი ჩაწოდება დათმო და სკანდინავიელს გათანაბრების საშუალება მისცა; მესამე სეტში პირველი ბრეიკი შვედმა გაახერხა, მაგრამ ნიკამ მალევე დაიბრუნა, რის შემდეგ საქმე ტაიბრეიკამდე მივიდა. იქ კი, იმერი უკეთ გაისარჯა და ძირითად ბადეში მოხვედრას სკანდინავიელი გააგრძელებს.
