“ასეთი ფეხბურთელები მსურს, რომლებიც…” – ენრიკე კვარაცხელიაზე

პარი სენ-ჟერმენის მთავარმა მწვრთნელმა, ლუის ენრიკემ პრესკონფერენციაზე ძირითადი ყურადღება თავის შემტევ ფეხბურთელებზე გაამახვილა.

ესპანელმა სპეციალისტმა ისაუბრა იმ სტილზე, რომელსაც თანამედროვე ფეხბურთში ეძებს და აღნიშნა, რომ მისთვის პრიორიტეტი მხოლოდ გოლის გატანაზე ორიენტირებული მოთამაშეები არაა:

“მე ვაფასებ ფეხბურთელებს, რომლებიც მხოლოდ შედეგზე არ არიან ორიენტირებულნი. ისინი, ვინც ბურთს იღებენ, ინიციატივას იჩენენ და პირად ორთაბრძოლებში უშიშრად მიდიან — ასეთი მოთამაშეები მჭირდება. ჩვენ გვყავს რამდენიმე შემტევი, რომლებიც ტექნიკითა და სითამამით გამოირჩევიან”, – განაცხადა ენრიკემ.

პსჟ-ს თავკაცმა კონკრეტული გვარებიც დაასახელა და იმედოვნებს, რომ ისინი მატჩის ბედის შეცვლას შეძლებენ:

“დუე, ბარკოლა, დემბელე, მაიული და კვარაცხელია ისეთები არიან, ვისაც შეუძლია როგორც საჯარიმოში, ისე მის ფარგლებს გარეთ ეფექტურად და შედეგიანად მოქმედება.”

მთავარ მწვრთნელს, როგორც ჩანს, თავისუფალი და კრეატიული თამაში უფრო იზიდავს, ვიდრე დისციპლინირებული სქემური ჩარჩო:

“მიხარია, როცა ისინი მოედანზე თავისუფლად გრძნობენ თავს და თავიანთი თამაშით სიამოვნებას იღებენ. ეს არის ის, რაც თანამედროვე ფეხბურთში ძალიან მნიშვნელოვანია”, – დასძინა ლუის ენრიკემ.