გვატემალადან პორტუგალიამდე

მისგან უკვე აღარაფერი გვიკვირს. დეკადები ჩაივლის და კრიშტიანო რონალდუს ფენომენზე მუდამ ილაპარაკებენ.

ვეტერანი პორტუგალიელი ფორვარდის საკლუბო თუ სანაკრებო მიღწევების არზა იმდენად შთამბეჭდავია კაცი იფიქრებს კიდევ რაღა უნდა შემატოსო, მაგრამ ის არ ჩერდება, მართლაც რომ რეკორდების მანქანაა.

ამჯერად რითი გააოცა საფეხბურთო სამყარო? მსოფლიოს ჩემპიონატის საკვალიფიკაციო ეტაპის საუკეთესო მეგოლე გახდა, უფრო სწორად  კარლოს რუისს გაუთანაბრდა. გვატემალელი შემტევის ანგარიშზე, რომელმაც კარიერა 2016 წელს დაასრულა 39 გოლი გალხდათ და მისი შედეგიც ხელშეუხებელი იყო.

ჰოდა, კრიშტიანო რისი კრიშტიანოა რაიმეს და მითუფრო ვინმეს რეკორდების მსხვრევას შეუშინდეს. მსოფლიოს ჩემპიონატის შესარჩევი ეტაპის მორიგ მატჩში პორტუგალიამ სტუმრად უნგრეთს 3:2 სძლია და რონალდუმაც თავი პენალტის ნიშნულიდან გატანილი გოლით გამოიჩინა, რაც მისთვის ისტორიული აღმოჩნდა.

მოკლდე, რონალდუს რუისის მსგავსად 39 გოლი დაუგროვდა და ალბათ ეჭვიც არავის ეპარება, რომ ამაზე არ გაჩერდება. უახლოეს ხანებში დიდებული პორტუგალიელი მსოფლიოს ჩემპიონატების საკვალიფიკაციო ტურნირის საუკეთესო მეგოლეც გახდება.

აქვე ისიც დავძინოთ, რომ რონალდუს და რუისის შემდეგ 36 გოლით ლიონელ მესი მოდის.