თბილისიდან უსაქმოდ – ილიევს კარისკენ მიუთითეს

7 სექტემბერს, მსოფლიო ჩემპიონატის საკვალიფიკაციო ეტაპის მეორე ტურში, საქართველოს ნაკრებმა თბილისში ბულგარეთს თავსხმა წვიმაში 3:0 ხომ მოუგო და პლუს ამას სტუმართა გუნდის დამრიგებელი ილიან ილიევიც შეიწირა.

გადაწყვეტილი ამბავია, რომ 57 წლის სპეციალისტი თანამდებობას დატოვებს. ამის შესახებ ბულგარეთის ფეხბურთის ფედერაციის ბოსებმა თბილისური ცივი შხაპის შემდეგ მალევე განაცხადეს.

გაირკვა ისიც თუ ვინ იქნება ილიევის მემკვიდრეც. ბულგარული ფეხბურთის მამები საძებნელად შორს არ წასულან და ნაკრების მწვრთნელიც იქვე სამშობლოში იპოვნეს – დიმიტარ დიმიტროვ-ხერო, რომელიც ბოლოს ვარნის სპარტაკს ავარჯიშებდა, ამჟამად კი თავისუფალი აგენტი გახლდათ.

„მსოფლიო ჩემპიონატის შესარჩევი ეტაპის მეორე მატჩში ბულგარეთის ნაკრები საქართველოში 0:3 დამარცხდა. „სამფეროვნები“ პირველ 15 წუთში ღირსეულად გამოიყურებოდნენ, მაგრამ შემდეგ სასაცილო გოლები გაუშვეს და შეიძლებოდა კიდევ უფრო დიდი ანგარიშითაც დამარცხებულიყვნენ.

მტკივნეული წაგების გამო მწვრთნელი ილია ილიევი ნაკრების მთავარი მწვრთნელის პოსტს დატოვებს. ბულგარეთის ფეხბურთის ფედერაციამ უკვე მისი შემცვლელი კანდიდატიც მონახა“ – ნათქვამია ბულგარეთის ფეხბურთის ფედერაციის განცხადებაში.

ილიან ილიევი ბულგარეთის ნაკრების თავკაცად 2023 წელს დაინიშნა. მას კონტრაქტი 2025 წლის ბოლოს ეწურებოდა, თუმცა პოსტი ნაადრევად დაატოვებინეს.