ზედიზედ მეორედ – კიტეიშვილის მორიგი აღიარება

საქართველოს ნაკრების ხერხემალი ოთარ კიტეიშვილი ავსტრიის ჩემპიონატის 2024/25 წლების სეზონის საუკეთესო ფეხბურთელად დაასახელეს. აღნიშნული ჯილდო გრაცის შტურმის ქართველი ლეგიონერისთვის უცხო არ არის. მან ეს აღიარება შარშანაც მოიპოვა.

ამჯერად გამოკითხვაში მონაწილეობა ავსტრიის ბუნდესლიგის გუნდების კაპიტნებმა მიიღეს და მათაც ყველასგან სწორედ ოთარ კიტეიშვილი გამოარჩიეს. გალა დაჯილდოება Bruno Gala ვენაში შედგა, თუმცა თავად ოთარი მას ვერ დაესწრო და მიზეზიც საპატიოა – კიტეიშვილი საქართველოს ნაკრებთან ერთად ესპანეთშია შეკრებაზე, თუმცა იქ მყოფ საზოგადოებას სიტყვით სპეციალური ვიდეო გზავნილით მიმართა.

„ეს არა მხოლოდ ჩემი, არამედ მთელი გუნდის დამსახურებაა. დიდი პატივია ჩემთვის ამ ჯილდოს მიღება, მაგრამ მას გუნდის მხარდაჭერის გარეშე ვერ მოვიპოვებდი. მადლობა ყველას ამ აღიარებისთვის“ – აღნიშნა მიმართვაში ქართველმა ნახევარმცველმა.

წინა სეზონში ოთარ კიტეიშვილმა შტურმის მაისურით ავსტრიის ბუნდესლიგაში 32 მატჩი გამართა და 12 გოლი გაიტანა.