კვარაცხელია ჩემპიონთა ლიგის საუკეთესო ფეხბურთელია

ხვიჩა კვარაცხელია ჩემპიონთა ლიგის 2025-26 წლების სეზონის საუკეთესო ფეხბურთელია!

ევროპული ფეხბურთის მმართველმა ორგანომ სეზონი შეაჯამა და საუკეთესოები გამოარჩია. პსჟ-ს ქართველი ლეგიონერი ტურნირის საუკეთესო ფეხბურთელადაც დასახელდა და სიმბოლურ ნაკრებშიც მოხვდა.

კვარაცხელიამ ამ სეზონში პსჟ-ს მაისურით 10 გოლი გაიტანა და ექვსი საგოლე პასი გააკეთა, რაც კილიან მბაპესთან (15+1) და ჰარი კეინთან (14+2) ერთად საუკეთესო მაჩვენებელი იყო. ხვიჩამ ჩემპიონთა ლიგის ფლეი ოფის რეკორდიც დაამყარა – ზედიზედ შვიდ მატჩში საგოლე ქმედება შეასრულა. ასევე კეინთან, ფრანსისკო ტრინკაუსთან და ვიქტორ ოსიმენთან ერთად, ყველაზე მეტჯერ, ოთხჯერ გახდა მატჩის საუკეთესო ფეხბურთელი.

UEFA ლიგის საუკეთესოს 2021-22 წლების სეზონიდან ავლენს და კვარაცხელია ამ ნომინაციის მეხუთე გამარჯვებულია. ლიგის საუკეთესო მოთამაშის წოდება პირველად ქარიმ ბენზემამ (საფრანგეთი; რეალი) მოიპოვა, 2022-23 წლების სეზონში როდრიმ (ესპანეთი; სიტი), 2023-24 წლებში ვინისიუსმა (ბრაზილია; რეალი), გასულ სეზონში კი, უსმან დემბელემ (საფრანგეთი; პარი სენ-ჟერმენი).

კვარაცხელია მეორეა ვინისიუსის შემდეგ, რომელმაც UEFA-ს ვერსიით ჩემპიონთა ლიგის საუკეთესო ახალგაზრდა მოთამაშის ტიტულიც მოიპოვა. ქართველმა ეს 2022-23 წლების სეზონში ნაპოლის მაისურით შეძლო, რეალის ბრაზილიელმა კი, ერთი სეზონით ადრე.

UEFA-ს სიმბოლური ნაკრები:

რაია; ლორენტე, მარკინიოსი, გაბრიელი, ნუნუ მენდეში; ოლისე, რაისი, ვიტინია, კვარაცხელია; დემბელე, კეინი.