ლიპარტელიანი: დედა წინააღმდეგი იყო, ბებო კი…

ქართველი ძიუდოისტი, მსოფლიოს ჩემპიონი ეთერ ლიპარტელიანი „კვირის პალიტრასთან“ საუბარში ოჯახსა და კარიერის გზაზე ისაუბრა და განსაკუთრებით ბებია მოიგონა, რომელიც მისი მთავარი მხარდამჭერი იყო.

„ბავშვობაში ბებო სულ მარწმუნებდა, რომ არასოდეს დავნებებულიყავი. მეუბნებოდა, ჯერ კარიერაზე იფიქრე და ოჯახი მერე შექმნეო. დედა წინააღმდეგი იყო, რომ სპორტს გავყოლოდი, მაგრამ ბებო ყოველთვის გვერდით მედგა. საოცარი ქალი იყო – ახალგაზრდობაში ცხენით დაჯირითობდა, იარაღიც თან ჰქონდა და კაცებს აშინებდა კიდეც. ალბათ ოცი სხვადასხვა სამსახური მაინც გამოუცდია. ძალიან ენერგიული და ჭკვიანი ადამიანი იყო,“ – იხსენებს ლიპარტელიანი.

სპორტსმენის თქმით, ბებიამ მისი უდიდესი წარმატება ვეღარ იხილა:

„95 წელი იცოცხლა. ჩემს მსოფლიოს ჩემპიონობას ვერ მოესწრო, თუმცა მანამდეც ბევრჯერ გავახარე. სულ ლოცულობდა – დილა-საღამოს ღმერთს სთხოვდა, გთხოვ, ეთოს მსოფლიოს ჩემპიონობა დაანახეო. როდესაც ეს ტიტული მოვიპოვე, სწორედ ბებო დამიდგა თვალწინ. ყოველ ტურნირზე მახსენდება, როგორ ლოცულობდა ჩემთვის.“