ნაკრების მწვრთნელი გაირკვა, პრეზიდენტი გასარკვევია

28 ოქტომბერს, საქართველოს ძიუდოს ეროვნულმა ფედერაციამ სასტუმრო „რადისონ ბლუ ივერიაში“ პრესკონფერცია და აღმასკომის წევრთა შეხვედრა გამართა.

შეხვედრაზე ფედერაციის ხელმძღვანელებმა ახალ პროექტებთან დაკავშირებით ორი გეგმა წარმოადგინეს: „გამოწვევა 2029“ (საქართველოში გასამართი მსოფლიოს ჩემპიონატის ფარგლებში) და „გამოწვევა 2032“ (სიდნეის ოლიმპიადის ფარგლებში). ორივე პროექტის მონაწილეები დაკომპლექტდებიან ახალგაზრდა და ჭაბუკი ძიუდოისტებით, რომლებიც მზადებას სპეციალური პროგრამით გაივლიან.

სიახლეა სანაკრებო მზადების ნაწილშიც: მომდევნო ორი წლის განმავლობაში სანაკრებო ხელმძღვანელობას გურამ მოდებაძე ჩაიბარებს. მოდებაძესთან კონტრაქტი ორი წლით გაფორმდება და ზედიზედ ორჯერ ექნება ამ თანამდებობის დაკავების უფლება. ლოს-ანჯელესის ოლიმპიადისთვის მზადების პროცესში ოლიმპიური ნაკრები მაქსიმალურად ინდივიდუალური პროგრამითა და მიდგომით მოემზადება.

გურამ მოდებაძის სანაკრებო ხელმძღვანელად დანიშვნის შესახებ ფედერაციის ვიცე-პრეზიდენტმა დავით ქევხიშვილმა ისაუბრა.

დავით ქევხიშვილი:

„ვულოცავ გურამ მოდებაძეს თანამდებობაზე არჩევას. დიდი ხანია იმსახურებდა ამ ყველაფერს და დარწმუნებული ვარ, როგორც აქამდე იყო, ამჯერადა მეტად ღირსეულად გაართმევს თავს ამ მეტად საპასუხისმგებლო თანამდებობას“.

ცვლილებებია ფედერაციის მმართველობაშიც: პრეზიდენტი ლევან ნოზაძე საქმიანობას აღმასრულებელი დირექტორის თანამდებობაზე გააგრძელებს. პრეზიდენტის რიგგარეშე არჩევნები კი, 1 დეკემბერს გაიმართება. საპრეზიდენტო არჩევნებში მონაწილეობის მსურველებს კანდიდატურის წარდგენა 1 ნოემბრამდე შეეძლებათ.