ლოლუა და ზოიძე ევროფინალში იჭიდავებენ

ალბანეთის დედაქალაქ ტირანაში დაიწყო ევროპის ჩემპიონატი ჭიდაობაში. მედლებისთვის ბრძოლაში თავდაპირველად ბერძნულ-რომაული სტილით მოჭიდავეები ჩაერთვნენ და საქართველოს დელეგაციას ორი მედალი გარანტირებული აქვს. ვახტანგ ლოლუა (55) და რამაზ ზოიძე (77) ფინალში გავიდნენ.

ლოლუა ტურნირში მეოთხედფინალიდან ჩაება და ბულგარელი სტეფან გრიგოროვი 9:0 დაამარცხა; ნახევარფინალში კი, სომეხ მანველ ხაჩატრიანს 3:1 აჯობა.

ზოიძემ დიდი გზის გავლა მოუწია და ოთხი მეტოქე დაამარცხა: ესპანელი მარკოს სანჩეს სილვა მეხიასი (8:2), ხორვატი ანტონიო კამენიასევიჩი (9:3), სერბი ალეკსა ილიჩი (5:2) და რეიტინგის პირველი ნომერი, უნგრელი რობერტ ფრიტში (8:0).

პირველ დღეს ევროპირველობაში კიდევ სამი ქართველი ჩაება: ფრიდონ აბულაძემ (63) ფინელი ტინო ტაპიო ოიალა კი დაამარცხა, მაგრამ მოლდოველ ვიტალი ერიომენკოსთან 0:5 წააგო. მოლდოველი ფინალში გავიდა და აბულაძე ბრინჯაოსთვის ბრძოლაში გაიყოლა, სადაც თურქ კერემ კამალს დაეჭიდება.

მძიმეწონოსანი სულხან ბუიძე (130) პირველივე შეხვედრაში უნგრელ დარიუს ვიტეკთან 1:1-ზე დამატებითი მაჩვენებლით დამარცხდა. თუმცა, უნგრელი ფინალში გავიდა და ბუიძე ბრინჯაოსთვის ბრძოლას აგრძელებს.

87 კგ-მდე წონით კატეგორიაში ლაშა გობაძემ შვეიცარიელ დამიან ვონ ეუს 10:0 სძლია, ხოლო უკრაინელ იაროსლავ ფილჩაკოვს ვეღარ გაუმკლავდა – 1:3.

ხვალიდან საქმეში დიმიტრი ხაჩიძე (60), დიეგო ჩხიკვაძე (67), იური ლომაძე (72), გელა ბოლქვაძე (82) და გიორგი მელია (97) ჩაებმებიან.