რევანშის დროა – პარიზში მურსიისთვის

წლის რიგით მეორე დიდი სლემი გათამაშება სტარტს 25 მაისს აიღებს. საუბარია ძირითადი ბადის დაპირისპირებებზე, თორემ ჩოგბურთის მოყვარულთ ეცოდინებათ, რომ მანამდე როლან გაროსის კორტებზე საკვალიფიკაციო ეტაპის მატჩები მიმდინარეობდა. სწორედ ამ გზით გააღწია მთავარ ბადეში ნიკოლოზ ბასილაშვილიც, რომელსაც სამი მეტოქის დამარცხება მოუხდა.

პორტუგალიელი ჰენრი როჩას სახელი სამეფო სპორტის გულშემატკივრებს ბევრს არაფერს ეუბნება, თუმცა 21 წლის ჩოგბურთელს ჩვენებური ერთხელ უკვე დამარცხებული ჰყავს. მისი და ნიკოლოზ ბასილაშვილის გზები შარშან მურსიის ჩელენჯერზე გადაიკვეთა და მაშინ პორტუგალიელმა ქართველს აჯობა.

ერთი წლის შემდეგ, ბასილაშვილს შესანიშნავი შანსი აქვს პორტუგალიელს, რომელიც რეიტინგის 201-ე ნომერია რევანში აუღოს. საფრანგეთის ღია პირველობის საწყის ეტაპზე მისი მეტოქე სწორედ ჰენრი როჩა იქნება, რომელიც ძირითად ბადეში ასევე საკვალიფიკაციო ტურნირის გავლით მოხვდა.

პორტუგალიელი მეჩოგნის ბარიერის გადალახვის შემთხვევაში ნიკოლოზ ბასილაშვილის მეტოქე ფრანგ ალექსანდერ მიულერსა და ჩეხ იაკუბ მენსიკს შორის გამარჯვებული იქნება.