საქართველო და ავსტრია რთული მატჩის მოლოდინში

8 ნოემბერს, საქართველოს ხელბურთელთა ნაკრები 2028 წლის ევროპის ჩემპიონატის შესარჩევი ეტაპის ჯგუფის მეორე მატჩში ავსტრიას დაუხვდება.

ავსტრიასთან მაინც და მაინც კარგი მოგონებები არ გვაქვს. აქამდე ექვსჯერ ვეთამაშეთ და ხუთი წავაგეთ. საქართველომ გამარჯვება ერთხელ შეძლო – შორეულ 2003 წელს.

სამაგიეროდ, კარგი მოგონებები აქვთ ერთმანეთში ორივე ნაკრების მთავარ მწვრთნელებს. საქართველოს თავკაცი რუბენ გარაბაიაა, ხოლო ავსტრიელებს მისი თანაგუნდელი ესპანეთის ნაკრებიდან – იკერ რომერო. მათ მოთამაშის კარიერისას მსოფლიო ჩემპიონატის ოქროსა და ბრინჯაოს, პეკინის ოლიმპიური თამაშების ბრინჯაოს, ხოლო ევროპის ჩემპიონატის ვერცხლის მედლები აქვთ მოგებული.

მატჩის წინ ორივე გუნდის მთავარმა მწვრთნელმა კომენტარი გააკეთა.

რუბენ გარაბაია:

„საკუთარ კედლებში თამაში მნიშვნელოვან უპირატესობას გვაძლევს, რადგან ჩვენი გულშემატკივრებისგან დიდი მხარდაჭერა გვექნება. ვიცით, რომ ავსტრია ძლიერი მეტოქეა, მაგრამ წინა თამაშიდან სათანადო დასკვნები უნდა გამოვიტანოთ, მოედანზე ჩვენი საუკეთესო მხარე ვაჩვენოთ და დადებითი შედეგისთვის ბოლომდე ვიბრძოლოთ“.

იკერ რომერო:

„ძალზე რთული მატჩი გველოდება. მათ კარგი გუნდი ჰყავთ. თურქეთთან მოპოვებული გამარჯვება ჩვენთვის უმნიშვნელოვანესი იყო, რადგან შედეგმა თავდაჯერებულობა შეგვმატა. მოთამაშეები სრულად მობილიზებულნი არიან და სურთ, მომდევნო ნაბიჯიც წარმატებული იყოს“.

ამ ჯგუფში ასევე ნორვეგია და თურქეთი თამაშობენ. პირველ ტურში ავსტრიამ თურქეთს შინ 37:30 მოუგო, ხოლო საქართველო ნორვეგიასთან 23:40 დამარცხდა. ორი საუკეთესო ნაკრები ევროს წინასწარ ჯგუფურ ეტაპზე გავა, მათ ასევე შეუერთდებათ რვა ჯგუფიდან ოთხი საუკეთესო მესამეადგილოსანიც.