ტიტულიც და პირველობაც

ორ წლიანი პაუზის შემდეგ კარლოს ალკარასი კვლავ რეიტინგის პირველი ნომერია. კლასიფიკაციაში საუკეთესოობა კი ესპანელმა ჩოგბურთელმა ამერიკის ღია პირველობის საჩემპიონო თასთან ერთად იანიკ სინერს აწაპნა.

მეიჯორებზე, სინერის და ალკარასის ჯახი აღარავის უკვირს. წლეულს, ისინი დიდი სლემების ფინალში მესამედ გადაეკვეთნენ და თუ როლან გაროსზე გამარჯვება ესპანელმა იზეიმა, უიმბლდონზე იტალიელის ტრიუმფის დრო დადგა. აი, წლის ბოლო სლემის გადამწყვეტ მატჩში კი, უკეთესი საფრანგეთის ღია პირველობის მსგავსად, ისევ 22 წლის ესპანელი იყო და ნაცნობ მეტოქესაც ოთხ სეტში – 6:2, 3:6, 6:1, 6:4 აჯობა.

კარლოს ალკარასმა დიდი სლემის გათამაშება კარიერაში მეექვსედ მოიგო და ამ მაჩვენებლით დიდებულ იანგ ბორგს გაუთანაბრდა. საქმე იმაშია გახლავთ, რომ ამ ასაკში ამდენივე მეიჯორი სწორედ ლეგენდარულ შვედ ჩოგბურთელს ჰქონდა მოგებული, ამიერიდან კი ამით კარლოს ალკარასსაც შეუძლია იამაყოს.

ფინალური დაპირისპირება 2 საათსა და 42 წუთს გაგრძელდა, რომლის განმავლობაშიც ალკარასს არცერთი ორმაგი შეცდომა არ დაუშვია, ხოლო თავის მხრივ 10 ეისი შეასრულა. US OPEN-ზე ტრიუმფით ესპანელმა 5 მილიონი ამერიკული დოლარიც გამოიმუშავა.