ქამბექი არ შედგა – NBA-ს ფინალისტები გაირკვნენ

NBA-ში აღმოსავლეთი კონფერენციის გამარჯვებულიც გაირკვა – ექვს მატჩიან სერიაში ინდიანა პეისერსმა ნიუ იორკ ნიქსი 4-2 დაამარცხა.

მეხუთე თამაშში დამაჯერებელი გამარჯვების შემდგომ საკალათბურთო გულშემატკივრებს ნიქსის დაბრუნების იმედი და მოლოდინი გაუჩნდათ, თუმცა სულ ტყუილად – ინდიანამ მეექვსე თამაშში სერია მარტივად დახურა.

მატჩის საუკეთესო კალათბურთელი კვლავ პასკალ სიაკამი გახდა – კამერუნელის ანგარიშზე 31 ქულა და 5 მოხსნა იყო. აღსანიშნავია, რომ სიაკამი არა მხოლოდ დღევანდელი, არამედ სერიის MVP-ც სრულიად დამსახურებულად გახდა, რადგან თავისი გუნდის აშკარა ლიდერი იყო.

ფინალებში ინდიანას მეტოქე ოკლაჰომა სითი იქნება, რომელმაც რეგულარული სეზონიც უპრობლემოდ მოიგო და კონფერენციის ფინალებიც მინესოტასთან (4-1), ერტადერთი გუნდი, რომელმაც მას დისკომფორტი შეუქმნა, ნიკოლა იოკიჩის დენვერ ნაგეტსი იყო.

ფინალების პირველი შეხვედრა 6 ივნისს, 04:30 საათზე გაიმართება.