ქართული რაგბის სეზონს დუბლები გახსნიან

30 აგვისტოს ქართული რაგბი შიდა საკლუბო სეზონს იწყებს და პირველად მოედანზე დუბლშემადგენლობები გავლენ. საქართველოს რაგბის კავშირის გამგეობის გადაწყვეტილებით, წლევანდელი სეზონიდან დუბლების ჩემპიონატში ასაკობრივი შეზღუდვა დაწესდა – 23-წლამდე.

ცვლილებები დაფუძნებულია ადგილობრივ მორაგბეთა მონაცემებზე. ასევე გათვალისწინებული იქნა საერთაშორისო პრაქტიკა და შედგა კონსულტაციები კლუბებთან.

დუბლების ჩემპიონატში მომავალ სეზონში 2003-07 წლებში დაბადებული მორაგბეები ითამაშებენ, მაგრამ თითოეულ მატჩზე გუნდებს შეეძლებათ უფროსი ასაკის ხუთი მოთამაშის დამატება. კაცთა და დუბლებში მონაწილე კლუბმა საშეჯიბრო განაცხადში უნდა დაარეგისტრიროს მინიმუმ 50 მორაგბე – აქედან მინიმუმ 27 მოთამაშე 23 წლამდე ასაკის უნდა იყოს. ასევე საერთო განაცხადში უნდა იყოს მინიმუმ 10 პირველხაზელი – აქედან მინიმუმ ოთხი 23 წლამდე.

ნებადართულია ორმაგი რეგისტრაცია: თუ კლუბს არ გამოყავს 23 წლამდე გუნდი, მის მორაგბეებს უფლება აქვთ დაემატონ სხვა კლუბის 23-წლამდელთა გუნდს. თუმცა, კაცთა გუნდში თამაშის უფლება მხოლოდ საკუთარ კლუბში ექნებათ.

ამრიგად, მოთხოვნები დააკმაყოფილეს და დუბლების ჩემპიონატს იწყებენ შემდეგი კლუბები: თბილისის ლელო-სარასენსი, ხვამლი, არმია და ლოკომოტივი, ბათუმი, ქუთაისის არესი, ბოლნისის სტუ ყოჩები, რუსთავის ხარები, პატარძეულის ვეფხვები და ფოთი.

პირველი მატჩები 30 აგვისტოს გაიმართება. ტურის კალენდარი კი ასეთია: ფოთი ლელოს უმასპინძლებს, ლოკომოტივი ბათუმს დაუხვდება, ხოლო ვეფხვები – არესს; 31 აგვისტოს არმია ყოჩებს უმასპინძლებს, ხარები კი – ხვამლს.