შეთავაზება ინგლისიდან – ზურიკოს ახალი მსურველი ჰყავს

მიუხედავად ბევრი მსურველისა, ახალი სეზონი ზურიკო დავითაშვილმა მაინც სენტ-ეტიენში დაიწყო და გოლის გატანაც მოასწრო, თუმცა ჯერ სატრანსფერო ფანჯარა არ დასრულებულა, შესაბამისად ზურიკოს ტრანსფერის შანსები კვლავაც არსებობს.

ვინც ქართველი ფეხბურთელის გარშემო შექმნილ ვითარებას აქტიურად ადევნებს თვალს, ეცოდინება, რომ დავითაშვილს ლიგა 2-ში თამაში დიდად არ ხიბლავს და ახალი გამოწვევებისთვის მზადაა, თუმცა, თავის მხრივ, სენტ-ეტიენსაც არ სურს გუნდის ერთ-ერთი ლიდერის გაშვება, რადგან მიზანი უმაღლეს დივიზიონში დაბრუნებაა.

ფრანგული გამოცემა Le Progrès-ის ინფორმაციით, დავითაშვილს ახალი მსურველი, ვესტ ჰემი გამოუჩნდა. როგორც ირკვევა, ლონდონურ კლუბს ტრანსფერის დახურვა ფანჯრის დასრულებამდე სურს, თუმცა ეს მარტივი არ იქნება. ჯერჯერობით, ოფიციალური შეთავაზება არ გაკეთებულა.

ნებისმიერ შემთხვევაში, დავითაშვილის სადმე გადაბარგება ნაკლებად მოსალოდნელია, სენტ-ეტიენს ლიგა 1-ში დაბრუნება აქვს მიზნად, რაც ზურიკოს გარეშე ძალიან გაუჭირდება.