UFC-ში მორიგი ქართველი იჩხუბებს? – მებრძოლის ვინაობა ცნობილია

ქართველი მებრძოლი ლევან ჩოხელი კარიერაში ახალ და უმნიშვნელოვანეს ეტაპზე გადადის. როგორც თავად სპორტსმენმა სოციალურ ქსელში დააანონსა, ის უახლოეს მომავალში UFC-ში პირველ ბრძოლას ჩაატარებს.

“მნიშვნელოვანი ახალი ამბავი ჩემი მხარდამჭერებისთვის. ცოტა ხნის წინ UFC-ს ვესაუბრე და ჩემი სადებიუტო შეხვედრა ორგანიზაციაში მალე შედგება. მზად ვარ, აქტიურად ვემზადები და ველოდები მოკლე ვადაში ჩასანიშნ ბრძოლას”, – დაწერა ჩოხელმა საკუთარ ოფიციალურ გვერდზე.

28 წლის ჩოხელი MMA-ს სამყაროში საკმაოდ გამოცდილი მებრძოლია – მას 17 პროფესიული შეხვედრა აქვს ჩატარებული, საიდანაც 14 გამარჯვება მოიპოვა, მათ შორის 11-ჯერ მოწინააღმდეგე ნოკაუტით დაამარცხა.

მანამდე ქართველი სხვადასხვა ორგანიზაციაში ასპარეზობდა, მათ შორის ბელატორში, ხოლო ბოლოს Phoenix FC 4-ის ფარგლებში იასპარეზა, სადაც ალექსანდრე გონსალვეში დაამარცხა. მისი კარიერის დიდი ნაწილი ქვესაშუალო წონით კატეგორიაში (77 კგ) მიმდინარეობდა.