ბელა ხოტენაშვილი ევროპის ვიცე-ჩემპიონია

მონტე კარლოში დასრულდა ევროპის ჩემპიონატი ბლიც-ჭადრაკში, სადაც ბელა ხოტენაშვილი მეორე ადგილს დასჯერდა.

არადა, ჩვენებური ჩემპიონობასთან ძალიან ახლოს იყო. ბელას ბოლო ტურში უშუალო კონკურენტთან ყაიმიც ჰყოფნიდა, მაგრამ ნიდერლანდელ ელინ როებერსთან შავი ფიგურებით წააგო. საბოლოოდ, ორივე მოჭადრაკემ თანაბარი ქულები (10-10) დააგროვეს, ნიდერლანდელი კი ჩემპიონი სწორედ ურთიერთშეხვედრის წყალობით გახდა.

9.5 ქულით მესამე-მეექვსე ადგილები გაიყო ნინო ბაციაშვილმა, დამატებითი მაჩვენებლებით კი მეხუთე ადგილზე დარჩა. მერი არაბიძემ 9.0 ქულით მე-10 შედეგი აჩვენა.

მონტე კარლოში ევროპის ჩემპიონატი დღეიდან უკვე სწრაფ ჭადრაკში დაიწყება და ქართველი გოგონები ძალებს იქ მოსინჯავენ.

ხოტენაშვილის, ბაციაშვილისა და არაბიძის გარდა მონტე კარლოში ლელა ჯავახიშვილი, ქეთი წაწალაშვილი, ინგა ჭარხალაშვილი, ანასტასია კირთაძე, სოფიო გვეტაძე და კესარია მგელაძე ითამაშებენ.