გამართლება ჩანაცვლებით

დაიწყო ერთმა, ხოლო გააგრძელებს მეორე. უფრო თუ დავკონკრეტდებით და დავაზუსტებთ, მეოთხეს ჩაანაცვლებს მეხუთე.

ალბათ დაიბენით. ახლავე მოგახსენებთ. მოკლედ, საქმე იმაში გახლავთ, რომ უეფას კონფერენს ლიგის 2025/26 წლების ტურნირზე, რომელიც ჯერ ხეირიანადაც არ გახურებულა, სლოვაკეთის ფეხბურთის ფედერაციას  იძულებითი ნაბიჯის გადადგმა მოუხდა.

„ჩვენ ევროპაში ვართ“ – ამ გზავნილით მიმართა საფეხბურთო კლუბმა კოშიცემ საკუთარ ქომაგებს და ეს ამბავი მათთვის მართლაც მოულოდნელი სიურპრიზი იქნებოდა.

მოკლედ, ბევრი რომ არ გავაგრძელოთ კოშიცემ კონფერენს ლიგაზე დუნაისკა სტრედა ჩაანაცვლა. ერთი შეხედვით ეს უსამართლობაა, რადგან ამ უკანასკნელმა ევროტურნირებზე თამაშის უფლება ადგილობრივ ჩემპიონატში მეოთხე ადგილზე გასვლით სპორტული პრინციპების დაცვით დაიმსახურა, მაგრამ არსებობს ერთი მაგრამ…

უეფას წესდების მიხედვით, ორ გუნდს თუ ერთი მფლობელი ჰყავს, რომელიმე ევროტურნირებში მონაწილეობას ვერ მიიღებს. სლოვაკურ კლუბს კი იგივე მეპატრონე ჰყავს, როგორც უნგრულ დიორს, რომელიც მიმდინარე კონფერენს ლიგაზე ასევე მონაწილეობს.

დუნაისკა სტრედა კონფერენს ლიგაზე მეორე ეტაპიდან უნდა ჩართულიყო, თუმცა როგორც უკვე ავღნიშნეთ არ გაუმართლა და ტურნირიდან მოიკვეთა. სხვათა შორის, ეს სლოვაკური გუნდი ჩვენთვის კარგად ნაცნობია, თუმცა მთლად ტკბილად ნამდვილად არ გვახსენდება. 2018 წელს, სწორედ ამ სლოვაკურმა გუნდმა გამოთიშა თბილისის დინამო ევროპა ლიგის პირველი საკვალიფიკაციო ეტაპიდან.