გიორგი ცხოვრებაძის ახალი გუნდი ცნობილია

საქართველოს ხელბურთელთა ნაკრების წამყვანი მოთამაშე, გიორგი ცხოვრებაძე კარიერას ხორვატიის ჩემპიონ ზაგრებში გააგრძელებს. რამდენიმე დღის წინ მან შეთანხმებით გაწყვიტა კონტრაქტი გერმანულ გუმერსბახთან და ახალი სეზონიდან უკვე ბალკანურ გრანდში იასპარეზებს. ამის შესახებ ინფორმაციას Handball-world.news ავრცელებს.

ზაგრებმა მომავალი სეზონის გუნდის დაკომპლექტება სწორედ ცხოვრებაძის ტრანსფერით დაასრულა. 23 წლის ქართველი ხელბურთელი გუნდს სისწრაფეს, შემოქმედებითობასა და გოლების რეალიზების მაღალ შესაძლებლობას შესძენს. მთავარი მწვრთნელის, ანდრია ნიკოლიჩის შტაბი დიდი იმედებით ხვდება მის ჩართვას გუნდში.

ახალ სეზონში ხორვატიის ჩემპიონი არა მხოლოდ ადგილობრივ ჩემპიონატში იასპარეზებს, არამედ ჩემპიონთა ლიგაშიც. პირველი მატჩი 11 სექტემბერს, ჩრდილოეთ მაკედონიაში, პელისტერის წინააღმდეგ გაიმართება.

ცხოვრებაძე, რეზო ჭანტურიას შემდეგ პირველი ქართველი ხელბურთელი იქნება, რომელიც ევროპის ყველაზე პრესტიჟულ საკლუბო ტურნირში მიიღებს მონაწილეობას. ჭანტურიამ სკოპიეს მეტალურგის შემადგენლობაში ლიგის ჯგუფურ ეტაპზე ორჯერ ითამაშა – 2005-06 და 2008-09 სეზონებში.