დემირალი: ხვიჩა კვარაცხელია უდიდესი ფეხბურთელია, თუმცა…

საქართველოსა და თურქეთს შორის უმნიშვნელოვანესი მატჩის წინ თურქთა მთავარმა მწვრთნელმა ვინჩენცო მონტელამ და ერთ-ერთმა ლიდერმა, მეჰმეთ დემირალიმ პრესკონფერენციაზე ისაუბრეს:

მონტელამ განაცხადა:

„როგორც იცით, ჩვენთან ოთხი მეკარეა და ყველა კარგ ფიზიკურ კონდიციაშია. ვინ დაიწყებს შეხვედრას, ამის წინასწარ თქმა არ მსურს. კარგად მახსოვს, თბილისში იტალიის ნაკრების შემადგენლობაში რომ ვითამაშე, თუმცა ახლა უკვე სხვა ქვეყნის სახელით ვმონაწილეობ. ვარჯიშის გრაფიკთან დაკავშირებითაც გადაწყვეტილება მივიღეთ, რომ დილით გვევარჯიშა. რაც შეეხება ევროპის ჩემპიონატზე ჩვენს გამოსვლას, ვაცნობიერებთ, რომ საქართველოს ბოლო წლებში სერიოზული წინსვლა აქვს და მათთან თამაში ნამდვილად რთული გამოწვევაა“.

იტალიელმა სპეციალისტმა განსაკუთრებულად აღნიშნა არდა გიულერის შესაძლებლობები:

„გიულერის თამაშს მუდმივად ვაკვირდები. მას სხვადასხვა პოზიციაზე შეუძლია გამოსვლა და მისი გამოყენება კონკრეტულ მატჩზეა დამოკიდებული“.

დემირალმა კი გუნდის განწყობაზე ისაუბრა:

„ჩვენ კოლექტივში ძალიან პოზიტიური ატმოსფეროა. ორ მოთამაშეს შორის კონფლიქტზე არაფერი გამიგია. ხვიჩა კვარაცხელია უდიდესი ოსტატობის ფეხბურთელია, თუმცა ჩვენ ძლიერი მზადება გავიარეთ და მზად ვართ, მასთან და მთლიანად საქართველოს ნაკრებთან ღირსეულად დავუპირისპირდეთ“.