ცეცხლაძის პოკერი – სპაერი მეოთხედფინალში

ეროვნული ლიგა 2-ის წარმომადგენელმა სპაერმა საქართველოს თასის მერვედფინალში ფოთის კოლხეთი 1913 დრამატულ შეხვედრაში 4:2 დაამარცხა და მეოთხედფინალში გავიდა.

შეხვედრა ფოთელთა უპირატესობით დაიწყო — უკვე მე-5 წუთზე სანდრო ავალიანმა ანგარიში გახსნა, ხოლო გიორგი ცხოვრებაშვილმა მე-60 წუთზე კოლხეთი ორი ბურთით წინ გაიყვანა.

თუმცა, სპაერის გმირად გიორგი ცეცხლაძე იქცა, რომელიც შეცვლაზე შევიდა და გუნდს მოაგებინა: ცეცხლაძემ 73-ე წუთზე სხვაობა შეამცირა, ხოლო მსაჯის მიერ კომპენსირებულ დროში (90+3) ანგარიში გაათანაბრა. არადა, მანამდე პენალტიც გააცუდა – 17 წლის ალექსანდრე დადეშქელიანმა აუღო. საერთოდაც, ოთხი გაშვებული გოლის მიუხედავად, კოლხეთის მეკარეს მშვენიერი მატჩი ჰქონდა.

ანგარიშის გათანაბრებას მალევე მოედანზე ჩხუბი მოჰყვა და არბიტრმა მოედნიდან ორივე გუნდის ფეხბურთელები – თორნიკე შეყილაძე და გიგა სამხარაძე გააძევა. ჩხუბის დროს მოედანზე სამოქალაქო ფორმაში მყოფი ადამიანებიც ვიხილეთ, რაც კარგი ფაქტი ნამდვილად არ არის…

დამატებით დროში სცენაზე კვლავ ცეცხლაძე გამოვიდა: 105-ე და 109-ე წუთებზე ზედიზედ ორი გოლი გაიტანა და სპაერს გამარჯვება მოუტანა.

შეგახსენებთ, რომ გასულ წელს საქართველოს თასი სწორედ სპაერის გამარჯვებით დასრულდა და წელს ტიტულის შენარჩუნებას ფიქრობს.

მეოთხედფინალში სპაერი გორის დილას ეთამაშება.

აქვე სხვა წყვილებიც:

მეშახტე-იბერია 1999;

რუსთავი-სამტრედია;

ლოკომოტივი-დინამი (ბთ);