ზღაპრული გზა გრძელდება

თბილისის სპაერი საქართველოს სუპერთასის ფინალში გავიდა. ეროვნული ლიგა 2-ის წარმომადგენელმა კლუბმა, რომელმაც გასულ სეზონში საქართველოს თასის მოპოვება შეძლო, ახლა უკვე პრესტიჟული ტიტულისკენ კიდევ ერთი ნაბიჯი გადადგა.

ნახევარფინალურ შეხვედრაში სპაერი ქუთაისის ტორპედოს დაუპირისპირდა და დრამატული მატჩის შემდეგ პენალტების სერიაში მოიპოვა გამარჯვება. თუმცა, თამაშის მსვლელობის მიხედვით, თბილისის გუნდს საქმე უფრო ადრე უნდა დაესრულებინა — მინდორზე მათი უპირატესობა თვალსაჩინო იყო.

მნიშვნელოვანი ეპიზოდი პირველი ტაიმის ბოლოს დაფიქსირდა, როდესაც ქუთაისელთა ცენტრალური მცველი ერიკ პიმენტელი გააძევეს. მექსიკელმა ორჯერ მიიღო ყვითელი ბარათი, მეორე ეპიზოდში კი პენალტიც დაინიშნა. თუმცა, საბა გეგიაძემ თავისი შანსი ვერ გამოიყენა – ბურთი კარს ასცდა.

მეორე ნახევარში სპაერი კიდევ უფრო აქტიურად უტევდა. უპირატესობა რიცხობრივადაც და თამაშის ხარისხითაც მათ მხარეს იყო. ტორპედოს მეკარემ ოთო გოშაძემ მთელი მატჩის განმავლობაში 7 სეივი განახორციელა, ერთხელ კი მის გუნდს ძელმა უშველა.

მატჩი ძირითადი დროში გოლის გარეშე დასრულდა და ბედი პენალტების სერიამ გადაწყვიტა. აქ უპირატესობა უკვე თბილისელებს დარჩათ. ბუხუტი ფუტკარაძემ მატეო იტრაქისა და საბა კვერკველიას დარტყმები მოიგერია და სპაერი ფინალში გაიყვანა.

სუპერთასის გადამწყვეტ მატჩში თბილისის სპაერი გორის დილას შეერკინება. ხოლო ტორპედო მესამე ადგილისთვის ბრძოლაში იბერიას დაუპირისპირდება.