საქართველოს ეროვნული ნაკრები ოქტომბერში ორ მნიშვნელოვან შეხვედრას გამართავს: 11-ში ელჩეში ესპანეთის წინააღმდეგ, ხოლო 14-ში იზმითში — თურქეთის ნაკრებთან.
სფფ-ის ვიცე-პრეზიდენტმა, ალექსანდრე იაშვილმა, მოახლოებულ თამაშებზე და ზოგადად ქართული ფეხბურთის მდგომარეობაზე ისაუბრა.
გიორგი ჩაკვეტაძის ტრავმა
„ჩაკვესთან მუდმივ კონტაქტზე ვარ. ძალიან მნიშვნელოვანი ფიგურაა ჩვენი ნაკრებისთვის. მისი პროფესიონალიზმი და დამოკიდებულება საქმესთან კარგად ვიცი და დარწმუნებული ვარ, დაბრუნდება ისეთივე ძლიერად, როგორც ადრე. ისიც იცის, რომ ჩვენს მხრიდან სრული მხარდაჭერა აქვს,“ – განაცხადა იაშვილმა.
დოლტმურზიევის პერსპექტივა
„ჰალიდ დოლტმურზიევისთვის დიდი ძალისხმევა ჩავდეთ, რომ საქართველოსთვის ეთამაშა. თუმცა, სიმართლე ის არის, რომ მას ჯერ კიდევ ბევრი აქვს დასამტკიცებელი. დინამო თბილისის ძირითადში არ გამოსულა, კონკურენცია კი ეროვნული გუნდისთვის ძალიან მაღალია. ვილი სანიოლი ყველა ფეხბურთელს აკვირდება, მათ შორის ახალგაზრდებსაც. თავად დაესწრო 17-წლამდელთა თამაშებს და კარგად იცის, ვინ როგორ თამაშობს,“ – აღნიშნა იაშვილმა.
საკლუბო ფეხბურთის პრობლემები
„ჩვენი საერთო საზრუნავია, რომ საკლუბო ფეხბურთი წარმატებული არ არის. რაც უფრო ძლიერი იქნება კლუბები, მით უფრო მომზადებული მივიღებთ ფეხბურთელებს ასაკობრივ ნაკრებებში. მზად ვართ, კლუბებთან თანამშრომლობისთვის, ახალი იდეებისთვის, რადგან სწორედ ეს განსაზღვრავს ნაკრების მომავალს,“ – თქვა სფფ-ის ვიცე-პრეზიდენტმა.
ქართველების თამაში ტოპლიგებში
„ძალიან მნიშვნელოვანია, რომ რაც შეიძლება ბევრი ჩვენი ფეხბურთელი იყოს მაღალი დონის ჩემპიონატებში. მე და ვილი სანიოლი ცოტა ხნის წინ ბუდუ ზივზივაძესთან და ლოჩოშვილთან ვიყავით. ასეთი კომუნიკაცია ძალიან მნიშვნელოვანია, როგორც მათთვის, ისე ჩვენთვისაც. ტოპლიგებში თამაში ზრდის კონკურენციას და საბოლოოდ ნაკრებშიც ძალას მატებს,“ – დასძინა იაშვილმა.
