ოთარ კიტეიშვილი – გამარჯვებისთვის მზად ვიყავით

ევროპა ლიგის მეორე ტურში ავსტრიულმა შტურმმა საკუთარ კედლებში რეინჯერსი მიიღო და 2:1 დაამარცხა. გრაცელთა წარმატების ერთ-ერთი მთავარი შემოქმედი კი ოთარ კიტეიშვილი გახლდათ.

ქართველმა ნახევარმცველმა გლაზგოელთა კარში მოხდენილი დარტყმით ლამაზი და როგორც შემდეგ გამოჩნდა გადამწყვეტი გოლიც გაიტანა. პირველ ტურში დანიურ მიდტიულანდთან წაგების შემდეგ, შტურმისთვის ეს გამარჯვება ორმაგად საჭირო გახლდათ.

ცხადია, მატჩის შემდეგ კმაყოფილი იყო ოთარ კიტეიშვილიც, რომელმაც პირველი ტურის დაპირისპირება მამის გარდაცვალების გამო გამოტოვა და სამშობლოში იმყოფებოდა.

„ეს ჩემთვის ძალზედ ემოციური მომენტი იყო. ის, რომ მოედანზე თავიდანვე შესანიშნავი ატმოსფერო გახლდათ ამან ჩვენს თამაშზე დადებითი გავლენა მოახდინა. არ გვსურდა ტრიბუნებზე მყოფი გულშემატკივრები გაგვეწბილებინა.

გვჯეროდა რომ მოვიგებდით. თავიდანვე მთელი გუნდი ამ განწყობით ვიყავით. ყველაფერი სწორედ ისე მოხდა, როგორც უნდა მომხდარიყო. პირველი ტაიმი დამაჯერებლად მოვიგეთ, მეორეში კი რეინჯერსმა მდგომარეობა გამოასწორა და გოლიც გაგვიტანეს, მაგრამ საბოლოოდ ჩვენთვის ყველაფერი კარგად დასრულდა. ეს ჩევნი მონდომებითა და ნებისყოფით შევძელით“ – აღნიშნა ოთარ კიტეიშვილმა.