კვალიფიკაცია გავლილია, წინ დიდი გამოცდაა

როლან გაროსის დასრულებასთან ერთად საგრუნტო ტურნირებიც მიილია და საჩოგბურთო სამყაროც ნელ-ნელა ბალახის შეჯიბრებებში ერთვება. მართალია, უიმბლდონამდე ჯერ საკმაო დროა, თუმცა ბალახის სეზონი უკვე დაიწყო და ჩოგბურთელებიც სხვადასხვა ტურნირებზე არიან გადანაწილებულნი.

ერთ-ერთი ასეთი ჰერტოგენბოშის 250-იანი ტურნირი გახლავთ, რომელიც როგორც მამაკაცთა, ასევე ქალთა შორისაც იმართება. ამჯერად ყურადღებას სწორედ სუსტი სქესის წარმომადგენელთა შეჯიბრზე გავამახვილებთ, სადაც ჩვენებურმა მარიამ ბოლქვაძემ საკვალიფიკაციო ეტაპი წარმატებით გადალახა, საამისოდ კი მას ორი მატჩის მოგება მართებდა.

ქართველმა ჩოგბურთელმა ჯერ ნიდერლანდელი ლოეს ებელინგ კონინგი დაამარცხა 6:3, 6:2, კვალიფიკაციის ფინალში კი არც ისე სუსტ და რეიტინგის ასეულში მყოფ უნგრელ დალმა გალფის ასევე ორ პარტიაში 7:6, 6:1 აჯობა და ძირითად ბადეში თამაშის უფლება მოიპოვა.

რაც შეეხება მთავარ ბადეს, იქ მარიამ ბოლქვაძეს უკვე სერიოზული გამოცდის ჩაბარება ელის. მისი მეტოქე რეიტინგის მე-19 ნომერი ეკატერინა ალექსანდროვა იქნება. აღნიშნული დაპირისპირება 10 ივნისს გაიმართება.