რუსების რისხვა

ჰალეს საჩოგბურთო ტურნირს, რომელიც ბალახის საფარზე იმართება და 500-იან კატეგორიას განეკუთვნება არც ისე დიდი ხნის ისტორია აქვს. ის 1993 წელს დაარსდა და ამ ზაფხულს 32-ედ გაიმართა.

გერმანიის ამ კოხტა ქალაქში ჩასვლას და აღნიშნულ ტურნირში მონაწილეობას არც ტოპ ჩოგბურთელები თაკილობდნენ. შარშან  გამარჯვებული სულაც რეიტინგის პირველი ნომერი იანიკ სინერი გახდა. ცხადია, იტალიელი მეჩოგნე ჰალეს კორტებზე ამჯერადაც გამოჩნდა და ტიტულის დაცვას შეეცადა, თუმცა უშედეგოდ. მას გზა სწორედ მომავალმა ჩემპიონმა ალექსანდრე ბუბლიკმა მეორე წრეში გადაუღობა.

საერთოდაც, ყაზახი ჩოგბურთელი, რომელიც კლასიფიკაციაში 45-ე პოზიციაზეა მიმდინარე სეზონში ჩინებულად გამოიყურება და სამეფო სპორტის მოყვარულთ თავი არაერთი შესანიშნავი თამაშით დაამახსოვრა. ასე იყო ჰალეშიც.

ბუბლიკი ფინალამდე ერთი ამოსუნთქვით მივიდა, იქ კი რუს დანილ მედვედევს ორ სეტში – 6:3, 7:6 აჯობა. საგულისხმოა, რომ ალექსანდრე ბუბლიკმა ჰალეში 2023 წელსაც იჩემპიონა და მაშინაც გადამწყვეტ მატჩში რუს ჩოგბურთელს ანდრეი რუბლევს მოუგო.

28 წლის ყაზახი ჩოგბურთელისთვის ეს კარიერაში ATP-ს მეხუთე მოგებული ტიტულია.