ლივერპულის ფანებმა მამარდაშვილს ზედმეტსახელი შეარქვეს

გიორგი მამარდაშვილმა ლივერპულის რიგებში თავისი პირველი თამაში უკვე ჩაატარა. ქართველმა მეკარემ ინგლისური გრანდის მაისურით პრესტონის წინააღმდეგ ამხანაგურ შეხვედრაში პირველი ტაიმი ითამაშა.

მიუხედავად იმისა, რომ მოედანზე მხოლოდ 45 წუთი გაატარა, მამარდაშვილის სტაბილურმა და თავდაჯერებულმა თამაშმა მერსისაიდელ გულშემატკივრებზე დადებითი შთაბეჭდილება მოახდინა. სოციალურ ქსელებში არაერთი ქომაგი აღნიშნავდა ქართველი კიპერის სიმშვიდეს, მობილურობასა და ფიზიკურ მძლავრობას.

სწორედ ამ უკანასკნელს უკავშირდება ზედმეტსახელიც, რომელიც მას გულშემატკივრებმა მალევე დაარქვეს. ბევრმა მამარდაშვილს უკვე „გიგანტი“ შეარქვა. აღნიშნული მეტსახელი პოპულარულმა ფან-გვერდებმაც აიტაცეს, რაც ცხადად აჩვენებს, რომ გიორგის მიმართ ინტერესი და სიმპათია სწრაფად მატულობს.

როგორც ჩანს, მამარდაშვილის ლივერპულური თავგადასავალი წარმატებით დაიწყო და მისი ადაპტაცია ახალ გარემოში საკმაოდ დამაიმედებლად მიმდინარეობს.