მამუს და ბითაძის გუნდებს გადამწყვეტი მატჩები ელით

NBA-ში ფლეი ოფის პირველი რაუნდის მატჩები დასასრულისკენ მიდის. გასარკვევი სამი წყვილია დარჩენილი და აქედან ორი ქართველის გუნდია.

გოგა ბითაძის ორლანდო ახლოს იყო ნახევარფინალში გასვლასთან, მაგრამ დეტროიტთან პირველი ტაიმის შემდეგ მოპოვებული 22-ქულიანი უპირატესობა გაანიავა, საბოლოოდ, 79:93 დამარცხდა და სერიაში (3:3) ანგარიში გათანაბრდა.

ფლორიდელებმა საშინელი მესამე (11:24) და კიდევ უფრო საშინელი მეოთხე (8:31) პერიოდები ჩაატარეს.

ბითაძემ მოედანზე 13:04 წუთი დაჰყო, რა დროშიც მის ანგარიშზე 6 ქულა, 4 მოხსნა, თითო პასი და დაფარება დაგროვდა. გოგამ ხუთიდან სამი ორქულიანი ჩააგდო, დაკარგვა არ ჰქონია, მისი მოედანზე ყოფნის პერიოდში კი, გუნდმა სამი ქულა წააგო.

„ჯადოქრებმა“ მოედნის უპირატესობა ხელიდან გაუშვეს და გუნდებს შორის მეშვიდე, გადამწყვეტი მატჩი, 3 მაისს, დეტროიტში ჩატარდება.

სერიაში ანგარიში გაათანაბრა სანდრო მამუკელაშვილის ტორონტომ. თუმცა, „რეპტილიები“ ახლოს იყვნენ გავარდნასთან – კლივლენდთან ოვერტაიმის დასრულებამდე წამით ადრე ბარეტის სამქულიანით 112:110 მოიგეს და ამ სერიაშიც მეშვიდე მატჩს ითამაშებენ.

მამუკელაშვილმა მოედანზე 14:24 წუთი გაატარა და გუნდს 2 ქულა, 4 მოხსნა, თითო პასი, ჩაჭრა და დაფარება შესძინა. სანდრომ ორიდან ერთი ორქულიანი ჩააგდო, ერთი სამიანი კი ააცილა. დაკარგვა არ ჰქონია, ხოლო მისი მოედანზე ყოფნის პერიოდში გუნდმა ოთხი ქულით მეტი ჩააგდო.

სერიის ბოლო შეხვედრა 4 მაისს, კლივლენდში, შედგება.

ამ წყვილებში გამარჯვებულები ერთმანეთს კონფერენციის ნახევარფინალში ხვდებიან. თუ ორივე ქართველის გუნდი გადამწყვეტ მატჩს მოიგებს, მაშინ ერთ მათგანს ფინალში ვნახავთ. თუმცა, ორივეს გუნდს თამაში სტუმრად უწევთ და, ცხადია, სხვა ვარიანტებიც არსებობს…