მარცხი, მაგრამ ღირსეული ბრძოლა

კონფერენსლიგის მეორე საკვალიფიკაციო ეტაპზე სპაერისთვის ისტორიული შეხვედრა ავსტრიაში შედგა ვენის აუსტრიას წინააღმდეგ.

მიუხედავად 0:2 წაგებისა, დებიუტანტმა გუნდმა ევროპის საფეხბურთო არენაზე ღირსეულად იასპარეზა და თავი არ შეურცხვენია. ეს კლუბი სულ რამდენიმე წლის წინ, 2017 წელს შეიქმნა და ეროვნულ ლიგაში თამაშის გამოცდილებაც კი არ ჰქონია. ევროთასებზე მოხვედრა გუნდმა საქართველოს თასის დაუვიწყარი გამარჯვებით შეძლო.

კლასის აშკარა სხვაობის მიუხედავად, ქართველებმა მატჩი იმ ენერგიით ჩაატარეს, რომელიც მხოლოდ მოტივირებულ და მებრძოლ გუნდს შეუძლია.

პირველი საგოლე მომენტიც სწორედ სპაერმა შექმნა, როცა პაპუნა ფონიავამ ძლიერად დაარტყა კარისკენ, ბურთი ოდნავ აცდა სამიზნეს. ამის შემდეგ თამაშში ინიციატივა მასპინძლებმა აიღეს და მე-8 წუთზე მანფრედ ფიშერის გოლით დაწინაურდნენ. პირველი ტაიმის ბოლოს აუსტრიას ორი რეალური შანსი ჰქონდა, თუმცა ორივე შემთხვევაში ხარიხამ იხსნა სპაერი.

მეკარე ბუხუტი ფუტკარაძე ერთ-ერთი გამორჩეული ფიგურა იყო, მან არაერთხელ შეაჩერა ავსტრიელთა შეტევები.

საბოლოოდ, მეორე გოლი მატჩის ბოლო წუთზე, პენალტით გავიდა, დომინიკ ფიცმა ზუსტად დაარტყა და ანგარიში 2:0 დააფიქსირა.

მიუხედავად წაგებისა, ანზორ კიღურაძის შეგირდებმა ევროპული ტურნირების პირველივე შეხვედრაში თავი პატივისცემით დაამახსოვრეს გულშემატკივარს.