მიქაუტაძე ესპანურ გრანდში – ვინ ეპატიჟება გიორგის

მას შემდეგ, რაც ლიონი ლიგა 2-ში დააქვეითეს, გიორგი მიქაუტაძის ტრანსფერზე მითქმა-მოთქმა არ წყდება. ქართველს როგორც საფრანგეთის, ასევე სხვა ტოპ ჩემპიონატებიდან ეპატიჟებიან, დღეს გავრცელებული ინფორმაციით კი მისი ტრანსფერი სულაც მადრიდის ატლეტიკოს სურს.

ესპანური გამოცემა Esto es Atleti იტყობინება, რომ ატლეტიკოში შემტევის ყიდვაზე მას შემდგომ დაფიქრდნენ, რაც მსოფლიო საკლუბო ჩემპიონატზე არც თუ ისე დამაჯერებლად გამოვიდნენ და ჯგუფში ჩარჩნენ.

როგორც ირკვევა, ატლეტიკოში სპორტინგის ვარსკვლავის, ვიქტორ გიოკერესის ტრანსფერი სურდათ, თუმცა როხიბლანკო შვედი ფორვარდისთვის ბრძოლას ნაადრევად ჩამოცილდა და ბაზარზე სხვა ალტერნატივებს ეძებს.

გამოცემის ცნობით, ერთ-ერთ ვარიანტად გიორგი მიქაუტაძე გამოჩნდა, ეს კი ლიონის გარშემო შექმნილმა ვითარებამ განაპირობა. ახლა მიქაუტაძის ყიდვა იმაზე იაფია, ვიდრე ლიგა 2-ში დაქვეითებამდე იყო, ხოლო გასულ სეზონში ბრწყინვალე ციფრებმა ატლეტიკოში მიქაუტაძის ტრანსფერზე დააფიქრეს.