შეუჩერებელი კარლოსი

მსოფლიო რეიტინგის მეორე ნომერმა, კარლოს ალკარასმა წლეულს უკვე ATP-ის მეხუთე ტიტული მოიგო. ახლახანს, როლან გაროსის ფინალში იანიკ სინერთან იმ დაუვიწყარი თრილერის შემდეგ, სადაც ესპანელმა ჩოგბურთელმა სასწაული მოახდინა და თითქოს წაგებული მატჩი მაინც სათავისოდ შემოატრიალა, ამჯერად ლონდონის 500-იანი კატეგორიის ტურნირზე გაიბრწყინა.

ესპანელი ტალანტი უფრო თიხის ჩოგბურთელად მიიჩნევა და სავსებით ლოგიკურადაც, თუმცა მისთვის დიდ დაბრკოლებას არც სხვა საფარი წარმოადგენს, რაც ლონდონის ბალახის კორტებზეც კიდევ ერთხელ დადასტურდა.

ლონდონის ქუინზ კლუბის ტურნირი საჩოგბურთო სამყაროში ერთ-ერთი უძველესია და ის ჯერ კიდევ მე-19 საუკუნეში დაარსდა. წლეულს, ინგლისის დედაქალაქში ჩოგბურთელები 139-ედ შეიკრიბნენ და ერთმანეთს ამ პრესტიჟულ ჯილდოს შეეცილნენ. ყველას კი როგორც თავში ავღნიშნეთ კარლოს ალკარასმა აჯობა.

ესპანელი ჩოგბურთელი ფინალამდე უპრობლემოდ მივიდა, იქ კი ჟირ ლეჰეჩკას სახით კერკეტი კაკალი ელოდა. ჩეხმა ალკარასს დიდი წინააღმდეგობა გაუწია და სეტიც კი წაართვა, თუმცა საბოლოოდ ყველაფერი მაინც ესპანელისთვის სასიკეთოდ დასრულდა – 7:5, 6:7, 6:2.

კარლოს ალკარასისთვის ეს უკვე კარიერაში მოგებული 21-ე ტიტულია.