ფლეი ოფის მეხუთე მატჩი ორივე ქართველმა წააგო

NBA-ში ფლეი ოფები გრძელდება და დღეს დილით ორივე ქართველის გუნდმა ითამაშა. ცუდი ის არის, რომ ორივე დამარცხდა. სანდრო მამუკელაშვილის ტორონტომ კლივლენდთან წააგო და სერიაში 2:3 ჩამორჩა, ხოლო გოგა ბითაძის ორლანდომ  დეტროიტში ვერაფერი გააწყო, მაგრამ სერიას კვლავ იგებს – 3:2.

კლივლენდისა და ტორონტოს დაპირისპირებაში ჯერ მხოლოდ მასპინძლები იგებენ. თავიდან კლივლენდმა ორი მოიგო, მერე ორიც ტორონტომ მიაყოლა, მეხუთეც ძალიან დაძაბული გამოვიდა და კვლავ მასპინძელმა მოიგეს – 125:120.

არადა, თითქმის მთელი მატჩის განმავლობაში წინ ტორონტო იყო, მაგრამ მასპინძლებმა ბოლო მეოთხედში იძალეს და სასურველ შედეგამდე მივიდნენ.

სანდრო საქმეში სათადარიგოთა სკამიდან ჩაერთო და პარკეტზე 15:26 წუთი გაატარა, რა დროშიც 10 ქულა, სამი მოხსნა და 1 დაფარება გაახერხა. ერთია, მამუს სროლები აშკარად არ წაუვიდა: ოთხიდან ერთი ორქულიანი ჩააგდო, ხოლო ხუთიდან – ორი სამქულიანი; ორივე საჯარიმო ზუსტი ჰქონდა. ბურთი არ დაუკარგავს, მისი მოედანზე ყოფნისას კი, გუნდმა ქულით წააგო.

მეექვსი მატჩი 2 მაისს, ტორონტოში გაიმართება.

გოგა ბითაძის ორლანდო ისევ სენსაციის მოლოდინშია. რეგულარული სეზონის გამარჯვებულმა დეტროიტმა სერიის მეხუთე მატჩი 116:109 მოიგო და სერიაში სხვაობა შეამცირა. არადა, წაგების შემთხვევაში დეტროიტელები ვარდებოდნენ.

გოგამ 13:36 წუთი ითამაშა და უქულოდ დარჩა. ჩვენებურმა ფარს მხოლოდ ერთხელ შეუტია და ისიც არაზუსტად. აქტივში ერთი მოხსნა და ორი დაფარება ჰქონდა, ხოლო პასივში ორი დაკარგვა. მისი მოედანზე ყოფნისას გუნდმა 13 ქულა წააგო.

მეექვსე მატჩი 2 მაისს, ორლანდოში შედგება.