შვიდქალას ერთი მოგება და ორი მარცხი

საქართველოს შვიდქალა ნაკრებმა, რომელიც რაგბი ევროპის ალაფისთვის ემზადება, პირველი მოსამზადებელი ტურნირი მონაკოში გამართა და სამი მატჩიდან ერთი მოიგო.

„პრინც ჟაკ ჰერედიტერის“ სტადიონზე გიორგი მაისურაძის შეგირდების პირველი მეტოქე მასპინძელი მონაკო იყო. მიუხედავად იმისა, რომ პირველ ტაიმში ჩვენი გოგონები ბურთს მეტოქეზე დიდხანს აკონტროლებდნენ, კონტრშეტევებზე ორი ლელო მიიღეს, რასაც შესვენების წინ მანონი საღარაძემ ერთი ლელოთი უპასუხა. მეორე ტაიმში მეტოქემ თავიდანვე შეძლო უპირატესობის გაზრდა და საბოლოოდ 46:5 გაიმარჯვა;

პოლონეთის ნაკრები, რომელიც შარშან რაგბი ევროპის ჩემპიონატზე მესამე ადგილზე გავიდა, თავიდანვე დაეუფლა უპირატესობას და საბოლოოდ 54:7 გვაჯობა. ჩვენი გუნდიდან ლელო თეონა ჩიტაიშვილმა გაიტანა, ანა პოღოსიანმა კი გარდასახა;

ტურნირის ბოლო მატჩი იტალიის ნაკრების მორაგბეებით დაკომპლექტებულ პრეტორიასთან გვქონდა. პირველ ტაიმში უპირატესობას ვფლობდით, მაგრამ ტაიმი ფრედ დასრულდა. მეორე ტაიმი უფრო უკეთ ვითამაშეთ და 22:12 გავიმარჯვეთ. ლელოები მანონი საღარაძემ, თეონა ჩიტაიშვილმა, ლიკა ხუფენიამ და ანა ხაბულიანმა მიითვალეს, მათგან ერთი პოღოსიანმა გარდასახა.

მონაკოს ტურნირზე საქართველოს შვიდქალამ ამ შემადგენლობით ითამაშა: ანა რურუა, ლიკა ხუფენია, სალომე მაკასარაშვილი, ნინო წიკლაური, ანა დათიაშვილი, ანა ხაბულიანი, თეონა ჩიტაიშვილი, მარიამ ბერანძე, ანა პოღოსიანი, კირა დანელია, მანონი საღარაძე, სალომე ჩხაიძე.