ყაზაიშვილი: ნაკრებში დაბრუნება დიდი ბედნიერება იქნება

ვაკო ყაზაიშვილი, ჩინეთის სუპერლიგაში ნამდვილად ბრწყინვალე სეზონს ატარებს. შანდუნ ტაიშანის შემტევი ნახევარმცველი ბოლო პერიოდში ფანტასტიკურ ფორმაშია და ზედიზედ შვიდ შეხვედრაში შედეგიანად ითამაშა. სეზონის განმავლობაში უკვე 22 გოლი და 5 საგოლე გადაცემა აქვს, რაც მას არა მხოლოდ კლუბის, არამედ მთელი ჩემპიონატის საუკეთესო ბომბარდირად აქცევს.

32 წლის ფეხბურთელი ჩინეთში ორჯერ დასახელდა ტურის საუკეთესო მოთამაშედ.

საქართველოს ნაკრებზე:

„ეროვნულ გუნდში ცხრა წელზე მეტი გავატარე და იქ ბევრი მეგობარი მყავს. დღემდე ვესაუბრები ბიჭებს, ხშირად ვჭორაობთ როგორც ფეხბურთზე, ისე ჩვეულებრივ თემებზეც. ძალიან მინდა ნაკრებში დაბრუნება, რადგან ეს ჩემთვის სამშობლოს საქმეა. ბოლოს დაახლოებით ორი წლის წინ ვითამაშე. თუ კიდევ მომეცემა შანსი, ნამდვილად უსაზღვრო ბედნიერება იქნება.“

ვაკო ყაზაიშვილს საქართველოს ნაკრებში დებიუტი 2014 წელს ჰქონდა. მას შემდეგ ეროვნული გუნდის მაისურით 63 შეხვედრაში მიიღო მონაწილეობა, სადაც 13 გოლი და 5 საგოლე გადაცემა მიითვალა. ნაკრებში ბოლოს 2022 წლის სექტემბერში, ერთა ლიგის მატჩში გიბრალტართან (2:1) გამოჩნდა. ამის შემდეგ ცნობილი სკანდალის გამო ვილი სანიოლმა მასზე აღარ გააკეთა არჩევანი.