“ამის შემდეგ ჩემთვის მესი რადიკალურად შეიცვალა”, – რა ისტორია გაიხსენა ხვიჩამ

სულ მალე მსოფლიოს საკლუბო ჩემპიონატის ეგიდით პსჟ და ინტერ მაიამი დაუპირისპირდებიან, რაც ნიშნავს, რომ ლეო მესი და ხვიჩა კვარაცხელია ერთმანეთის პირისპირ მოედანზე გამოვლენ.

აქამდე ხვიჩა და მესი ერთმანეთს ოქროს ბურთის დაჯილდოვებაზე შეხვედრილან. სეტანტა სპორტსთან ინტერვიუში ქართველმა ფეხბურთელმა არგენტინელ ვარსკვლავთან შეხვედრის მომენტი გაიხსენა:

“მესისთან შეხვედრა იყო ისტორია, რომელსაც შეიძლება არ დაუჯერო, თუმცა ამის შემდეგ ლეო ჩემს თვალში რადიკალურად შეიცვალა. რა თქმა უნდა, როგორც ფეხბურთელი, ის ფენომენალურია და ალბათ მსგავსს ფეხბურთის ისტორიაში ვერ შევხვდებით, თუმცა ის საოცარი პიროვნებაცაა.

შესვენებაზე, როცა ვისხედით, გვითხრეს, რომ მოძრაობისგან თავი შეგვეკავებინა, მესი ჩემგან რამდენიმე სკამის მოშორებით იჯდა, უცებ წამოდგა და ჩემსკენ დაიძრა, ვერ მივხვდი, რა ხდებოდა. როცა მომიახლოვდა, მან ხელი ჩამომართვა და მომესალმა, ძალიან დავიბენი და მეც მაშინვე წამოვდექი.

როცა ამხელა ფეხბურთელი გამარჯობის სათქმელად დგები, ეს ძალიან დასაფასებელია”, – განაცხადა კვარაცხელიამ.