არესმა ბონუსით მოიგო და მდევარს დაშორდა

crocobet დიდი 10-ის მე-11 ტურის პირველ მატჩში, ლიდერმა ქუთაისის არესმა თბილისის წიქარას 24:13 სძლია და სამით მეტი ლელოს გატანისთვის ბონუს-ქულაც გამოიმუშავა.

შედეგად, არესს 43 ქულა მოუგროვდა და უახლოეს მდევარ ბათუმს, რომელიც ტურის თამაშს კვირას გამართავს, ცხრა ქულით დაშორდა. წიქარა ნუგეშ-ქულის აღებასთან ახლოს იყო, მაგრამ დასკვნით წუთებში გადამწყვეტი ლელოს გატანა ვერ მოახერხა და 21 ქულით ჯერჯერობით მე-6 პოზიციაზე რჩება.

თამაში სტუმრების შეტევებით დაიწყო, მასპინძლები რამდენჯერმე დაჯარიმდნენ და სოსო მათიაშვილმა თბილისელები ორი ჯარიმით დააწინაურა. თუმცა, არესელმა იაგო ხაბულიანმა ორი ლელოთი უპასუხა. სანდრო ფურცხვანიძემ ერთი გარდასახა და ტაიმი 12:6 დასრულდა.

მეორე ტაიმის დასაწყისში ქუთაისელებმა არსენ მაჩალაძის ლელოთი უპირატესობა გაზარდეს; შემდეგ ეპიზოდში სტუმრების შერკინება დაჯარიმდა და წიქარა საჯარიმო ლელოთი დაისაჯა – 24:6.

წიქარამ გაიბრძოლა. ნიკა ლავრელაშვილმა ერთი საპასუხო ლელო გაიტანა, მათიაშვილმა კი გარდასახა, მაგრამ სულ ეს იყო…

მატჩის საუკეთესო მოთამაშე არესელი ზურა ოდიკაძე გახდა.