ასათიანი – ლეგიონერები არ გვჭირდება, ბიჭები დაფრინავენ

საქართველოს ფუტზალის ნაკრები რომ ევროპის ჩემპიონატზე ზედიზედ მეორედ გავიდა არახალი ამბავია. ავთანდილ ასათიანის შეგირდებმა პლეი-ოფის მატჩებში სლოვაკეთს აჯობეს და კონტინენტის პირველობაზე თამაშის უფლებაც დამსახურებულად მოიპოვეს.

ყველაფერთან ერთად სასიხარულო ფაქტი ისიც არის, რომ ჩვენმა გუნდმა ამ წარმატებას ლეგიონერების გარეშე მიაღწია. წინა ევროპის ჩემპიონატზე ნაკრების ძირითად ბირთვს ბრაზილიელი ფეხბურთელები წარმოადგენდნენ. როგორც ავთანდილ ასათიანმა განაცხადა, ლეგიონერების ხელახლა დამატებაზე საუბარი ზედმეტია.

„ევროპის ჩემპიონატისთვის ლეგიონერების დამატება? ამ საკითხს არც განვიხილავთ, პირდაპირ გეტყვით, რომ გამორიცხულია. ალბათ გემახსოვრებათ ბრაზილიელებთან დაკავშირებით მომხდარი უსიამოვნებები და ნამდვილად აღარ გვსურს იგივე სიტუაციაში აღმოვჩნდეთ. 

ესეც რომ არ იყოს ბიჭები შესანიშნავად ირჯებიან და დაფრინავენ. ევროპის ჩემპიონატზე თამაშის საგზური ქართველმა ფეხბურთელებმა მოიპოვეს და უსამართლობა იქნებოდა მათ ეს შანსი ხელიდან წავართვათ. ევროპის ჩემპიონატზე ის ბირთვი იქნება, რომლებმაც ეს ციკლი ითამაშეს. მათ ეს დაიმსახურეს“ – აღნიშნა ავთანდილ ასათიანმა.

ფუტზალში ევროპის ჩემპიონატი 21 იანვრიდან 7 თებერვლის ჩათვლით სამ ქვეყანაში – სლოვენიაში, ლატვიასა და ლიეტუვაში გაიმართება. რაც შეეხება წილისყრას, ის 24 ოქტომბერს შედგება.