მსოფლიო თასზე ოთხი ქართველი დაგვრჩა

ბათუმში, სასტუმრო „გრანდ ბელაჯიო“ გრძელდება მოჭადრაკე ქალთა მსოფლიოს თასი, სადაც საჩემპიონო ბრძოლას ოთხი ქართველი შემორჩა.

ნანა ძაგნიძემ რუს დარია ჩაროჩკინას ორივე კლასიკური პარტია მოუგო და 2:0 იმარჯვა. ძაგნიძეს შემდეგ რაუნდში სერიოზული მეტოქე ჰყავს – ასევე რუსი ვალენტინა გუნინა.

ლელა ჯავახიშვილმა აზერბაიჯანელ ულვია ფატალიევას პირველი პარტია თეთრებით მოუგო, მეორეში კი შავი ფიგურებით დაუზავდა – 1.5:0.5 და მომდევნო რაუნდში კიდევ ერთ რუსთან, პოლინა შუვალოვასთან გაარკვევს ურთიერთობას.

ბელა ხოტენაშვილმა ბულგარელ ნურგილ სალიმოვას 1,5:0,5 აჯობა, ხოლო არაბიძემ ასეთივე ანგარიშით ისრაელის წარმომადგენელი მარსელ ეფროიმსკი დაამარცხა.

არაბიძისა და ხოტენაშვილის მეტოქეები დღეს გაირკვევა.

ტურნირს გამოეთიშნენ ნინო ბაციაშვილი, ვინაც ყაზახი ელნაზ კალიახმეტის (0.5:1.5) ბარიერი ვერ გაიარა; კესარია მგელაძემ ინდოელ დეშმუხ ლივიასთან (0.5:1.5) წააგო; ანასტასია კირთაძე კი, ჩინელ თან ჩჟუნთან (0:2) დამარცხდა.