რაში გვჭირდება ველოსიპედი

დასრულდა ეროვნული ლიგის პირველი წრე და ჩემპიონატში ორთვიანი შესვენება გამოცხადდა. შეგახსენებთ, 2017 წელს გაზაფხული-შემოდგომის ფორმატზე იმიტომ გადავედით, რომ გუნდები ევროტურნირებს „გახურებული“ ჩემპიონატისას ტონუსში შეხვდებიანო.

როგორც ხვდებიან და რა „მიღწევებიც“ გვაქვს ევროტურნირებზე, მაგაზე ახლა არ ვისაუბრებთ. ისევ ფორმატს დავუბრუნდებით და იმ  სათქმელს, რაზეც კითხვები გვიჩნდება, ძალიან მოკლედ ვიტყვით.

სკანდინავიის გარდა, ევროპის ყველა ქვეყანაში ჩემპიონატები მაისის ბოლოს დასრულდა, ჩვენთან კი, პირველი წრე მიილია; სკანდინავიაში ჩემპიონატები მართლაც გახურდება, ხოლო ჩვენ 2 აგვისტოს… გავაგრძელებთ – ზუსტად იმ პერიოდში, როდესაც ყველგან ახალი სეზონი დაიწყება. მეტიც, ბევრი დაგვასწრებს და ივლისში განაახლებს.

ისინი ისვენებენ, ჩვენ ვთამაშობთ, მაგრამ ვისვენებთ, რადგან ტონუსში ვართ “შესასვლელები”.

აქ გვიჩნდება კითხვები:

ჩვენც ახლა რომ დაგვესრულებინა ჩემპიონატი და აგვისტოში გაგვენახლებინა, ხელს რამე შედეგის მიღწევაში შეგვიშლიდა?

არადა, ჰო ვიყავით შემოდგომა-გაზაფხულის სიტემაზე და რატომ მოვიგონეთ „ახალი ველოსიპედი“?

როდესაც ვხედავთ, რომ ამ ცვლილებამ არაფწერი მოგვცა, რატომ არ ვუბრუნდებით ყველგან მისაღებ ფორმატს?