საქართველომ ურუგვაი დაამარცხა და იტალიაზე გავიდა

საქართველოში მიმდინარე მსოფლიო რაგბის ახალგაზრდული ჩემპიონატის ჯგუფური ეტაპის დასკვნით მატჩში უმცროსმა ბორჯღალოსნებმა ურუგვაი 56:3 დაამარცხა და A ჯგუფი მესამე ადგილზე დაასრულა. ეს კი, ტურნირზე მხოლოდ მეცხრე ადგილის ნახევარფინალში თამაშის უფლება იძლევა.

„ავჭალაზე“ გამართულ შეხვედრაში ვიტო კოლელიშვილის შეგირდები სრულად დომინირებდნენ და მეტოქეს რვა უპასუხო ლელო გაუტანეს, საიდანაც სამი გუნდის კაპიტნის, ლუკა ნარსიას ანგარიშზეა. მიზანმა არ უმტყუნა ნიკოლოზ ხალვაშს, რომელმაც რვავე გარდასახვა ზუსტად შეასრულა.

საქართველო მეტოქეს ჯაბნიდა ჯანში და კონტაქტის არეში, რასაც მეტეოროლოგიური პირობების გათვალისწინებით, თან ერთვოდა ხელით ბურთაობა თუ ინდივიდუალური გარღვევები. მატჩის დაწყებისთანავე ავჭალაში გაწვიმდა. ნალექი იმდენად უხვი იყო, რომ ბურთს მოედანზე მოძრაობა უჭირდა, რამაც თამაშის მსვლელობას დაღი დაასვა, თუმცა ობიექტურად უფრო ძლიერმა გუნდმა შესაფერისი ანგარიშით გაიმარჯვა.

მეცხრე ადგილის ნახევარფინალში საქართველო იტალიელ თანატოლებს გაეჯიბრება. ბადის მეორე მხარეს ირლანდია და ფიჯი არიან. მატჩები 13 ივლისს, ქუთაისში გაიმართება.