საქართველო ინგლისთან ორმაგით დამარცხდა

საქართველოს 18 წლამდე ნაკრებმა, სამხრეთ აფრიკის საერთაშორისო სერიის პირველ მატჩში ინგლისთან 33:66 წააგო.

გიორგი ნემსაძის შეგირდები შეტევაში კარგად გამოიყურებოდნენ, მაგრამ მძლავრ და სხარტ ინგლისელებთან დაცვაში თამაში უჭირდათ. მეტოქე ბურთს ჩვენზე დიდხანს აკონტროლებდა და შესაბამისად, ორჯერ მეტი ლელო გაიტანა, რამაც საბოლოო შედეგი განაპირობა.

თამაში ინგლისელების შეტევებით დაიწყო, მე-9 წუთისთვის ორი გარდასახული ლელოთი დაწინაურდა, თანაც ბოლო ეპიზოდს სინბინით ლუკა ჭაკუა შეეწირა.

14-კაციანმა საქართველომ ბურთზე კონტროლის დამყარება მოახერხა, ხუთმეტრიანი დერეფნიდან მოლით ორჯერ შეუტია და მეორე ჯერზე ალექსანდრე გამყრელიძემ ლელო გაიტანა; თამაში რომ განახლდა პირველი ბურთი ვერ ავიღეთ, მეტოქემ მაღალ ტემპში შემოგვიტია და მესამე ლელო გაიტანა; მალევე მათი ლამაზი, ხელდახელ შეტევა მოყვა და მორიგი ლელო მივიღეთ; 25-ე წუთზე ფეხით გადაკიდებული ბურთი ვერ დავიმორჩილეთ და ინგლისელებმა მეხუთე ლელო დადეს; ამის შემდეგ ინიციატივას დავეუფლეთ და შესვენებამდე ორი საპასუხო ლელო გავიტანეთ.

მეორე ტაიმი პირველის მსგავსად მძიმედ დავიწყეთ. ინგლისმა ხელდახელ, ოფლოუდებით შეტევებით სამი ლელო გაიტანა და უპირატესობა გაზარდა; 62-ე წუთზე მათე ბერუაშვილმა ჯარიმის სწრაფად გათამაშებით და ლელოთი უპასუხა; ინგლისელებმა ორი ლელოთი საკუთარი უპირატესობა კიდევ უფრო გაზარდეს; მატჩის მიწურულს კი, საბა გოგრიჭიანმა მოლი მორიგი ლელოთი დაასრულა და თამაში 33:66 დასრულდა.

საქართველო სამხრეთ აფრიკის საერთაშორისო სერიის მეორე მატჩს 11 აგვისტოს მასპინძელთა წინააღმდეგ გამართავს, რომელმაც დღეს ირლანდიას დაძაბულ ბრძოლაში 32:31 აჯობა.