ქუთაისის ტორპედომ სუპერთასი მეოთხედ მოიგო

ქუთაისის ტორპედო სლავა მეტრეველის სახელობის საქართველოს სუპერთასის გამარჯვებულია. მიხეილ მესხის სახელობის სტადიონზე ჩატარებულ ფინალურ მატჩში რიონისპირელებმა მოქმედი ჩემპიონი იბერია 1999 დაამარცხეს.

ნახევარფინალში ორივე გუნდმა ერთნაირი ანგარიშით იმარჯვა: იბერიამ 1:0 თბილისის დინამოს მოუგო, ხოლო ტორპედომ ამავე ანგარიშით გორში დილას აჯობა.

ფინალი საინტერესო და დაძაბული გამოდგა. 34-ე წუთისთვის ტორპედო ორბურთიანი უპირატესობით იგებდა: გოლები კომნენ ანდრიჩმა და გიორგი არაბიძემ შეაგდეს.

ტაიმის ბოლოს მასპინძლებმა სხვაობის შემცირება ვახო ბედოშვილის გოლით მოახერხეს; 75-ე წუთზე კი, ნიკოლოზ დადიანმა ანგარიში გაათანაბრა.

პენალტების სერიაში ტორპედომ უკეთესად დაარტყა, მეტოქე 6:5 დაამარცხა და ქვეყნის სუპერთასის გამარჯვებული ისტორიაში მეოთხედ გახდა.

ფინალური მატჩის პარალელურად, გორში მესამე ადგილისთვის შეხვედრა გაიმართა, სადაც დილამ დინამო თბილისს უმასპინძლა. მატჩის ძირითადი დრო გატანილი გოლების გარეშე დასრულდა, პენალტების სერიაში კი დინამო თბილისმა 4:2 მოიგო.