შვიდკაცა არესმა მოიგო, შვიდქალა – პრინცესებმა

თბილისის შვიდკაცას ფინალში, ქუთაისის არესმა თბილისის ლელოს სძლია და ტურნირის გამარჯვებული გახდა, ქალებს შორის კი, პირველი ადგილი პრინცესებმა დაიკავა.

ორდღიან ტურნირს, რომელშიც რვა კაცთა და ოთხი ქალთა გუნდი მონაწილეობდა, ლოკომოტივის სარაგბო ბაზამ უმასპინძლა. აღსანიშნავია, რომ კაცთა და ქალთა ტურნირები, ერთდროულად პირველად გაიმართა.

კაცთა ტურნირში დიდი 10-ის შვიდმა გუნდმა ითამაშა: ბათუმმა, არესმა, რუსთავის ხარებმა და თბილისის ოთხმა კლუბმა – ლელომ, არმიამ, წიქარამ და ხვამლმა, ხოლო მერვე მონაწილე საქართველოს შვიდკაცა ნაკრების დებიუტანტები იყვნენ. ეს გუნდი ნაკრების იმ კანდიდატებით დაკომპლექტდა, რომელთაც შვიდკაცა რაგბი საერთაშორისო დონეზე არასდროს უთამაშიათ.

ნაკრების სხვა კანდიდატები სხვადასხვა კლუბში იყვნენ გადანაწილებული, რამაც მათ სათამაშო პრაქტიკა, ნაკრების მწვრთნელებს კი, მათზე დაკვირვების შესაძლებლობა მისცა.

სამეული არესმა, ლელომ და დებიუტანტების ნაკრებმა შეავსეს. საუკეთესო მოთამაშედ არესელი მიხეილ ჟორჟოლიანი დასახელდა; საუკეთესო მელელოვეები კი, ხვამლელი ლაშა კაკაურიძე და არმიელი გიორგი გამყრელიძემ (6-6) გახდნენ.

რაც შეეხება შვიდქალას, აქ ოთხი მონაწილე იყო: პრინცესები, ლოკომოტივი, აია და ნაკრების ბაზაზე შექმნილი გუნდი. მათ პირველ დღეს ჯგუფური ეტაპის სამ-სამი შეხვედრა ჩაატარეს, 17-ში კი ნახევარფინალები და ფინალები გამართეს. სამეულში ადგილები კი, ასე განაწილდა – პრინცესები, ლოკომოტივი და აია.

ქალთა შორის საუკეთესო მოთამაშის პრიზი ანა პოღოსიანს ერგო.