ხვიჩა საფონოვისა და ზაბარნის ურთიერთობას აგვარებს

ზაფხულის სატრანსფერო ფანჯარაზე პსჟ-მ ბორნმუთიდან ილია ზაბარნი შეიძინა, რომელიც გუნდმა დაცვის ხაზის გასაძლიერებლად მოიყვანა.

ჯერ კიდევ მოლაპარაკებების პროცესში ზაბარნისთვის ერთი მნიშვნელოვანი საკითხი წამოიჭრა – პსჟ-ს ღირსებას იცავს რუსი მატვეი საფონოვიც, ხოლო არსებული პოლიტიკური სიტუაციიდან გამომდინარე, რუსისა და უკრაინელის ურთიერთობა საკმაოდ რთულია.

რუსული Sport24-ს ინფორმაციით, პსჟ-ს ხელმძღვანელობამ, ასევე ლუის ენრიკემ და გუნდის კაპიტანმა მარკინიოსმა ამ საკითხთან დაკავშირებით საფონოვთან და ზაბარნისთან ისაუბრეს. როგორც ირკვევა, ორივე მხარე მზადაა, ჰქონდეთ საქმიანი ურთიერთობა.

როგორც ირკვევა, მათი ადაპტაციის პროცესში ჩართულია ხვიჩა კვარაცხელიაც. ის ვარჯიშის დროს ეხმარება როგორც საფონოვს, ასევე ზაბარნის. კვარაცხელია ფლობს რუსულ ენას, რითიც ორივე მათგანთან კომუნიკაციაშია. წყაროს ინფორმაციით, საფონოვსა და ზაბარნის შორის არაა მეგობრობა, თუმცა არის წმინდა სამუშაო ურთიერთობა.