20 წლის შემდეგ – არსენალი ლიგის ფინალში დაბრუნდა

20-წლიანი პაუზის შემდეგ არსენალი ჩემპიონთა ლიგის ფინალში დაბრუნდა. ჩრდილოლონდონელებმა ნახევარფინალის საპასუხო მატჩში მადრიდის ატლეტიკოს შინ 1:0 მოუგეს და ახლა მეტოქის მოლოდინში არიან.

არსენალი უკეთესი იყო. ბურთშაც მეტს აკონტროლებდა, შეტევებიც უფრო მწვავე ჰქონდა და ესპანური გუნდი თითქმის ყველა კომპონენტში დაჯაბნა. თუ რომელიმე გუნდი გამარჯვებას იმსახურებდა, ეს სწორედ მიკელ არტეტას გაწვრთნილი გუნდი იყო.

მატჩი სანახაობრივი არ გამოდგა. ესე ცლოგიკური და მოსალოდნელი იყო. ერთადერთი გოლი პირველი ტაიმის ბოლო წუთზე გავიდა. სწორედ მაშინ დაარტყეს ლონდონელებმა კარში პირველად. უფრო სწორად, ორჯერ – ტროსარის დარტყმული მეკარემ მოიგერია და ბუკაიო საკამ დაამატა – 1:0. არსენალს ამის მეტი კარში არ დაურტყამს.

ატლეტიკოს თავკაცმა, დიეგო სიმეონემ სიტუაციის გამოსწორება მეორე ტაიმში სამმაგი ცვლილებით სცადა, მაგრამ არაფერი გამოუვიდა. ერთი, რაც სტატისტიკაში ჩაიწერა, რომ მადრიდულმა კლუბმა ორჯერ უკვე თავად დაარტყა. ცხადია, უშედეგოდ.

ბოლოსკენ სიტუაცია დაიძაბა და ნერვიული გახდა. მსაჯსაც რამდენიმე ყვითელი ბარათის ჩამორიგება მოუწია, მაგრამ ამ ყველაფერს მატჩზე გავლენა არ მოუხდენია.

არსენალი ბოლოს ჩემპიონთა ლიგის ფინალში 2006 წელს იყო და ბარსელონასთან წააგო. ახლა ფინალშია, მაგრამ მეტოქე ჯერ არ იცის. ის კი 6 მაისს, ბაიერნისა და პსჟ-ს მატჩის შემდეგ გაირკვევა…