დვალმა ბუცები ჩამოხსნა და ზესტაფონს დაუბრუნდა!

გამოცდილი თავდამსხმელი ჯაბა დვალი კვლავ ვიხილეთ მინდორზე… 40 წლის ფეხბურთელმა დღეს, ლიგა 4-ის 23-ე ტურში, ზესტაფონისა და მარნეულის ალგეთის შეხვედრაში მიიღო მონაწილეობა. დვალი ძირითად შემადგენლობაში იყო, ხოლო მატჩი უგოლოდ — 0:0 დასრულდა.

ეს დვალისთვის მინდორზე დაბრუნების პირველი შემთხვევა არ არის — კარიერის დასრულების შემდეგ ის 2021 წელსაც დაუბრუნდა აქტიურ თამაშს და მაშინვე გოლითაც გამოირჩა ზესტაფონის შემადგენლობაში.

საინტერესოა, რომ დღესაც მოქმედ ფეხბურთელობასთან ერთად დვალი კლუბის აღმასრულებელი დირექტორის პოსტსაც იკავებს.

ზესტაფონი ამჟამად ლიგა 4-ის ცხრილში მე-12 პოზიციას იკავებს და გასავარდნ ზონასთან სხვაობა ერთი ქულაა.

შეგახსენებთ, ჯაბა დვალი ზესტაფონის ღირსებას წლების განმავლობაში იცავდა და ორჯერ გახდა საქართველოს ჩემპიონი. ეროვნულ ლიგაში კი მის ანგარიშზე 127 გოლია — ერთ-ერთი საუკეთესო მაჩვენებელი ჩვენს ჩემპიონატში.