ენრიკე ხვიჩასთან დაკავშირებით ჯიუტობს

ცნობილმა ფრანგმა ჟურნალისტმა დანიელ რიოლომ, სპორტულ გადაცემაში l’After Foot სტუმრობისას, პარი სენ-ჟერმენსა და ხვიჩა კვარაცხელიას თემას შეეხო.

RMC Sport-ის ჟურნალისტის თქმით, პარიზელთა მთავარი მწვრთნელი ლუის ენრიკე ქართველ ფეხბურთელთან დაკავშირებით ზედმეტად ჯიუტად მოქმედებს.

„ერთ საკითხში ლუის ენრიკე კვლავ უარზეა შეცვალოს მიდგომა – ეს არის კვარაცხელიას მარჯვენა ფლანგზე დაყენება. აშკარად ჩანს, რომ ეს პოზიცია მას არ უხდება და მისი საუკეთესო თვისებები არ ჩანს. თუ ენრიკე ნამდვილად დარწმუნებულია, რომ ფეხბურთელების როლების გარდაქმნა შეუძლია, მაშინ ასე გააგრძელოს, მაგრამ ეს მხოლოდ საშუალო დონის მეტოქეებთან მუშაობს, მაგალითად ბრესტთან ან ლორიენთან. როცა საქმე დიდ თამაშებს ეხება, ეს ტაქტიკა არ ამართლებს და პრობლემა ჩნდება,“ – აღნიშნა რიოლომ.

როგორც ცნობილია, მიმდინარე სეზონში ლუის ენრიკე ხვიჩა კვარაცხელიას ხშირად მარჯვენა ფლანგზე აყენებს, მარცხენა მხარეს კი ძირითადად ბრედლი ბარკოლა თამაშობს.

ხვიჩა კვარაცხელიამ ამ სეზონში უკვე 10 შეხვედრაში მიიღო მონაწილეობა ყველა ტურნირის გათვალისწინებით და ორი გოლის გატანა და ერთი საგოლე პასის გაკეთება შეძლო.