უდინეზეს დრამატული გამარჯვება – გოგლიჩიძის 90 წუთი

სერია ა-ს მერვე ტურში საბა გოგლიჩიძის უდინეზემ ლეჩეს უმასპინძლა და დრამატულ შეხვედრაში, 3-2 სძლია.

მასპინძლები უპირატესობას მთელი მატჩის განმავლობაში ფლობდნენ. მათ პირველი ტაიმი იასპერ კარლსტრომისა და კენან დევისის გოლებით დამაჯერებლად მოიგეს, თუმცა ლეჩემ მეორე ტაიმის სტარტზე ბერიშას გოლით სიტუაციის დაძაბვა მოახერხა. უდინეზემ 89-ე წუთზე სხვაობა კვლავ ორბურთიანი გახადა, თუმცა 96-ე წუთზე სტუმრების კიდევ ერთმა გოლმა სიტუაცია ოდნავ დაძაბა, მაგრამ უდინეზემ უპირატესობის შენარჩუნება შეძლო.

ჩვენთვის ეს მატჩი კიდევ უფრო საინტერესო იმით იყო, რომ 90 წუთი ითამაშა საბა გოგლიჩიძემ. იგი სამ მცველიან ტაქტიკაში პირველივე წუთიდან სასტარტო შემადგენლობაში იყო, თუმცა კარგი შეხვედრა ვერ ჩაატარა. სოფასქორის მიხედვით, გოგლიჩიძის შეფასება გუნდში ერთ-ერთი ყველაზე დაბალი, 6.4 იყო.

ჩატარებულ რვა მატჩში 12 ქულით უდინეზე სერია ა-ს მერვე ადგილზეა.