ბათუმში ქულები განაწილდა, იბერიამ წყალტუბოში იმარჯვა

ეროვნული ლიგის 23-ე ტურის ფარგლებში დღეს სამი შეხვედრა გაიმართა.

დინამო თბილისსა და გარეჯს შორის მატჩი გოლით არ დასრულებულა. შეხვედრა უგოლოდ, 0:0 დამთავრდა და გუნდებმა თითო-თითო ქულა გაინაწილეს.

წყალტუბოს სამგურალი საკუთარ მოედანზე იბერია 1999-ს დაუპირისპირდა. მატჩი სტუმართა გამარჯვებით დასრულდა – 1:0. ერთადერთი გოლი მე-40 წუთზე ნიკოლოზ დადიანმა გაიტანა, რომელსაც საგოლე პასი ლუკა სილაგაძემ გაუკეთა. შეხვედრის მსვლელობისას წყალტუბოელები კაცნაკლულებიც დარჩნენ — 23-ე წუთზე დემურ ჩიხლაძემ ორი ყვითელი ბარათი მიიღო და მოედანი დატოვა.

ტურის ცენტრალური მატჩი ბათუმში გაიმართა, სადაც დინამო ბათუმმა ქუთაისის ტორპედოს უმასპინძლა. დაძაბულ შეხვედრაში გამარჯვებული ვერ გამოვლინდა და მატჩი ფრედ — 2:2 დასრულდა.

ანგარიშის გახსნა პირველივე წუთზე თორნიკე კირკიტაძემ მოახერხა, 35-ე წუთზე კი კომნენ ანდრიჩმა გაათანაბრა. მალევე, მე-40 წუთზე იონსენმა ქუთაისური კლუბი წინ გაიყვანა, თუმცა 82-ე წუთზე დინამო ბათუმის ალბანელმა ლეგიონერმა მარამ წონასწორობა აღადგინა და მასპინძლებს ქულა მოუპოვა.

აღნიშნული სამი გუნდი სატურნირო ცხრილში შემდეგ ადგილებს იკავებენ:

დინამო ბათუმი – 35 ქულა (მეოთხე ადგილი)

ტორპედო ქუთაისი – 33 ქულა (მეხუთე ადგილი)

სამგურალი –  23 ქულა (მეშვიდე ადგილი) და გასავარდნ ზონას მხოლოდ 2 ქულით ჩამორჩება.