დიდი დაბრუნება

უქმობამ დიდხანს არ გასტანა. მასიმილიანო ალეგრი, რომელიც წელიწადიც არაა რაც უსაქმოდ იყო და შესაძლოა პენსიაზე გასვლასაც ფიქრობდა საქმეს უბრუნდება.

57 წლის იტალიელი სპეციალისტი, 2024 წლის ზაფხულში ტურინის იუვენტუსიდან წამოსვლის შემდეგ უგუნდოდ იყო, მაგრამ ასეთი დონის გამოცდილ მწვრთნელს რომ დიდხანს უმუშევარს არავინ დატოვებდა ძნელი მისახვედრი არ უნდა ყოფილიყო.

ჰოდა, ალეგრის მილანიდან შეეხმიანნენ. ოღონდ არა ინტერის, არამედ როსონერის ბანაკიდან. ნიშანდობლივია, რომ ალეგრის მთავარ მწვრთნელად მოყვანის დიდი სურვილი მილანის ახალ სპორტულ დირექტორს ალბანელ იგლი ტარეს ჰქონდა, რომელიც გუნდში ახალი დანიშნულია. ის მშვენივრად უწყოდა, რომ მასიმილიანოსადმი ინტერესს ახლადგაჩემპიონებული ნაპოლი და ინტერიც კი იჩენდნენ. ამიტომაც ტარეს ინიციატივით მოლაპარაკებები დაჩქარებული ტემპით წარიმართა და მხარეებმაც ხელი ხელს დაჰკრეს.

მასიმილიანო ალეგრი დასაწყისისთვის მილანთან ორ წლიან კონტრაქტს გააფორმებს ხელშეკრულების გახანგრძლივების პერსპექტივით. რაც შეეხება ანაზღაურებას, იტალიელი მწვრთნელი წელიწადში ხუთ მილიონს და სოლიდურ ბონუსებს ჩაიჯიბავს.

შეგახსენებთ, რომ მასიმილიანო ალეგრი მილანში 2010-2014 წლებშიც მუშაობდა და მაშინ სკუდეტოც მოიგო. ვნახოთ, ამჯერად როგორი იქნება დიდი დაბრუნება.